CM hova High Level Meeting on SASCI in SASCI Monitoring Committee din an rel

Nimin khan Chief Minister Lalduhoma kaihhruaiin ‘High Level Meeting on SASCI’ chu thukhawmin Chief Secretary kaihhruaina hnuaia SASCI Monitoring Committee din an rel nghal bawk.

Planning Department Conference Hall-a he thutkhawm kaihruaitu Chief Minister Lalduhoma chuan SASCI kalpui meka sawrkar duh dan te a sawi hmasa a. SASCI hi kan ramin hmasawnna ruhrel tha leh tlo a neih theih nan a tha em em tih sawiin, Department ten tha thlah lova tan an lak a tul hle tih a sawi a. Part 3 bikah hian State leh UT ten Centrally Sponsored Scheme (CSS) hmanga infrastructure an thawhnaa State Share-a an hman theih tur sum cheng vbc. singkhat dah a ni tih sawiin, “A che hmasa sa (first come first serve) tan a nih avangin kan chet ran zel hi a tha,” a ti a. Hmasawnna hnathawhna kawnga State rethei deuh ten harsatna an tawh nasat tak mai chu State share tur kan nei thin lo chu a nih thu sawiin, “Part 3 hian chumi a kan mutan chu min sutkiansak thei a ni,” a ti a. “Department hrang hrang ten SASCI hmalakna ah theihtawp in chhuah thin a ni tih report in pek atangin kan hre thei a, ka lawm hle a ni,” a ti bawk.

He thutkhawm ah hian Planning Department changtu Secretary Lalmalsawma Pachuau chuan SASCI part hrang hrang sawifiahin, chumi hnuah hmachhawp awm te leh chak deuh zawka hnathawh a tulna lai te an sawi a. A bik takin Reform Link Incentives hmuh theihna SASCI Part 5 - Mining Sector reform chungchang te, Part 6 - Scrapping of Old Vehicles & Electronic Enforcement of Road Safety chungchang te, Part 7 - Land related reforms by State Government in Rural Areas te, Part 8 - Land related reforms by State Government in urban areas te, Part 9 - Incentives to State for efficiency in Financial management chungchang te, Part 10 - Urban Planning reforms 2025-26 chungchang te chipchiar takin an sawizui a. Incentives te hi a tam thei ang ber dawn tumin sawrkar chuan tan a la dawn tih a sawi bawk.

He thutkhawm ah hian Ministers te, Chief Secretary, Commissioner leh SASCI Implementing Department Secretary te, Planning Department leh official pawimawh dangte an tel a, SASCI hnuaia hmalakna hrang hrangte vilzui turin Chief Secretary kaihhruaina hnuaia SASCI Monitoring Committee din a rel bawk a ni.