Tunhnaia ruahsur vangin ln 176 zet chhiain Serchhip District in a tuar nasa ber

Tunhnai ruahsur nasa avanga Mizoram hmun hrang hranga chhiatna thleng avangin nimin thlengin mi 5 in nunna an chan a, hmun 626-ah leimin leh leitawlh chhinchhiah ni bawkin Leimin avangin chenna In 176 zet a chhia a, chhawmdawlna hna hmun hrang hrangah kalpui chhunzawm zel a ni bawk.

State Emergency Operation Centre chhinchhiah danin, tunhnaia ruahsur nasa leh a kaihhnawih avang hian Mizoram hmun hrang hrangah chhiatna thleng a tam hle a, May ni 24 atanga nimin, June ni 3, 2025 tlai dar 4:00 thleng khan Mizoram hmun hrang hrangah leimin leh lei tawlh hmun 626-ah chhinchhiah a ni a, heng ah hian In chhia leh chim 176 awmin chenna In 247 te chuan In neitu leh luahtu ten luahzui ngam lovin an chhuahsan bawk a. Hmun 280-ah leimin avanga kawng pung awmin Retaining Wall chim hmun 41-ah a awm bawk a ni. Tun tuma chhiatna thleng ah hian Mizoram pumah nunna chan mi panga an awm a, an zinga mi pathum te chu Champhai District-ah niin Aizawl District-ah leh Serchhip District-ah mi pakhat ve ve ten nunna an chan bawk a, hmun pathum-ah Thlanmual chim awmin Lei tlahniam hmun 7-ah a awm bawk a, hmun 9-ah Electric ban tlu awm bawkin heng bakah hian Thing tlu leh lung tla bakah Sabereka Khuangkaih te pawh chhinchhiah a ni bawk.

Tun tuma chhiatna thleng hi Mizoram-a District hrang hrang zingah Serchhip District in a tuar nasa ber niin a lang a. Serchhip District-ah hian leimin leh lei tawlh hmun 136-ah chhin-chhiah awmin In chhia leh In chim pawh 45 lai chhinchhiah a ni a, chenna In 125 te chu In luahtu ten an rauhsan bawk a, tulian avanga In chhuahsan 60 an awm bawk a, nunna chan mi pakhat a awm bawk a ni.

Serchhip District-ah hian hmun 159-ah kawngping chhinchhiah awmin heng te hi thenfai mek a ni a, Electric ban tlu hmun 4-ah awmin tui lakna chhia pawh engemaw zat a awm a ni.

Heng bakah hian Serchhip Mat Phai ah tuilian in thlai hmun nasa taka chimin thlai pawh a chhe nasa hle a, hei bakah hian Leilet engemaw zat tuilian hian chimin kumin ah leilet hi siam theih a ni dawn em tih hriat ala harsa a ni.