BCM in Relief Sunday hmang

Nimin June thla-a Pathianni vawi thumna kha Mizoram Baptist Kohhran Ni pawimawh ‘Relief Sunday’ a ni a. BCM Tualchhung Kohhran tinah hman a ni.

Kumin Relief Sunday-ah hian ‘Pathian lawmtlak inthawina’ tih chu thupui-ah hman niin Pathianni zing inkhawmah Headquarters leh Tual-chung Kohhran Relief rawngbawlna chanchin report leh thupui thlansa hmangin thuchah ngaihthlak a ni a. Kum 1966-1968 lai vel khan Mizoram in hun khirh tak tak mai a tawk chho a, chumi hnuah Kohhran chuan mipui mangangte tanpuina tur thawhlawm (Relief Fund) a bika siam tha a ti a, chhawmdawlna rawngbawlna hi Kohhrante thinlungah tuh thar zela, uar deuh deuh a lo nih theih nan kumtin hman a lo ni ta a ni.

Relief & Development Department hian Khuarel chhiatna, tuilian, leimin, thli leh rial, kangmei bakah tanpui ngai an awmin chhawmdawl nan Tualchhung budget atang leh pawn lam tanpuina an hmuh atangin tanpuina an pe thin a. Tunhnai ruahsur leh thli tlehin Mizoram hmun hrang hranga harsatna a thlen ah tanpuina an pekchhuah tawh zawng zawng chu chhungkua 60 te hnenah Rs. 3,89,000 a ni a. Kum 2025 – 2026 chhunga Relief budget chu cheng nuai sawm a ni.