Ruahsur nasa kaihhnawiha Mat Phai-a chhiatna thleng Minister in a hmunah a enfiah

Agriculture Minister PC. Vanlalruata chuan nimin khan Serchhip rawn tlawhin tunhnaia ruahsur nasa kaihhnawiha Serchhip Mat Phai-a chhiatna thleng te a hmunah a tlawh a, Mat Phai-a kuthnathawktu ten harsatna an tawh dan te Minister hnenah hian sawiin, an mamawh te an lo thlen bawk a ni.

Agriculture Minister PC.Vanlalruata hian Serchhip Mat Phai Zawlpui zau a tlawhna ah hian tunhnaia ruahsur nasa avanga tuilian in buh leh thlai hmun a tihchhiat te chu a hmunah a en a, ruahsur nasa avanga loneitute tawrhna chu a tawrhpui thu leh theihtawp chhuaha sawrkarin an tana hma a lak tur thu a sawi a. Zawlpui Leilet mai bakah Serchhip khawpui chhunga chhiatna thlen nasatzia a takin a hmu tih sawiin, Mizoram-ah pawh a tuar nasa ber an ni tih a sawi a, pawi a tih thu leh ngai an awh leh theih nan sawrkarin theihtawp a chhuah tur thu a sawi a. NHIDCL te kawng siamin a nghawng, Serchhipa tunhmaa la thleng ngai lo Zawlpui leilet hmunhma heti taka tuilianin a tichhe ta mai chu pawi a tih thu pawh sawiin, “Hmasawnna ruhrel din a nih ruala environment ngaih pawimawh tel a tulzia te, fimkhur a tulzia te a tilang chiang hle a ni,” a ti.

Serchhip Mat Phai Zawlpui zau-ah hian tun tum ruahsur nasa khan leilet tam tak tichhiain tuilakna a tichhe hneh hle a. Zawlpui panna kawng pawimawh Tuichar Lei chu a bung a, Tuichar lui luanna pawh a insawn a. Leilet neitu ten tui an lakna luite luanna hmun insawn leh Lei dang chhia a awm bawk a. Zawlpui leilet neitute chuan Tuichar Lei siam that thuai an mamawh thu leh an tuilakna siam that an mamawh zia te Agriculture Minister hnenah hian an lo thlen bawk a ni.

Agriculture Minister in Serchhip Mat Phai a tlawh zawh hian Serchhip DC Office-ah Serchhip Bawrhsap Paul L. Khuma hovin thutkhawm an nei zui nghal a. He hunah hian Serchhip a chhiatna hrang hrang thleng te leh kuthnathawktute mamawh te Minister hian a sawipui a. Hei bakah hian Sawrkar flagship programme Bana kaih hnuaia Sawhthing hralh chungchanga an dinhmunte enpuiin DAMC hmalakna te an sawiho nghal a ni.

Serchhip a rawn thlen hma hian Tuikum Bialtu MLA ni bawk PC. Vanlalruat hian Bial chhunga Tlungvel, Chhingchhip, Baktawng leh Chhiahtlang khua te tlawhin khawtlang hruaitute nena an inkawm bawk a, Serchhip Mat Phai a tlawhna ah hian District Agriculture Officer (DAO) Lalchharliana leh DIPRO Lalnunmawii te bakah sawrkar Official ten an tawiawm a, Zawlpui Zau FMC hruaitu ten Minister hi an lo dawngsawng bawk a ni.