Kolasib-ah Lokayukta Awareness hun hman a ni

Mizoram Lokayukta buatsaihin nimin khan Kolasib-a I&PR Conference Hall-ah ‘Lokayukta Awareness Program’ hman a ni.

Nimin a hun hman hi Kolasib Bawrhsap Robert C. Lalhmangaiha chuan kaihruaiin he hun hmanpuitu Mizoram Lokayukta-a Member (Judicial) Joel Joseph Denga chuan Mizoram chu India rama corruption tlemna ber pahnihna a ni tih sawiin, “Amaherawhchu hemi ni chung hian document leh record a tarlan kher loh kan ramah eirukna lamah fihlim lohna tam tak inphumru a awm a ni,” a ti a. Corruption chu mihring ze nghet lo leh anmahni chhungril a intan a ni tih sawiin, “Corruption do tur chuan keimahni kan insiam dik hmasak angai a ni,” a ti bawk.

Mizoram Lokayukta Member (Judicial) chuan Sawrkar in hmasawnna ruhrel tur atana hnathawhna tur pawisa tam tak a sanction thin tih sawiin, “Chungte chu mimal ngaih pawimawh zawngah hman mai tur a ni lova, pawisa lokal te chu a nihna tur diktak a hman tur a ni,” a ti a. Mizoram hmasawnna tam tak ti thuanawptu chu kan duhamna a nih thin thu sawiin, Pass diklo pekchhuah te, Contract a nihna ang tur taka thawh loh te, sawrkar sum leh bungrua hman khawlohte kan ramah a hluar thin chu pawi a tih thu a sawi a, “Corrupt kan ni tih pawh inhriat tawhloh chen a ngaia neih khawpa corruption a awm thei a ni,” tiin “Chutah tak chuan mahni kan chian a , Pathian hmaa dinpui tlaka kan hna te thianghlim taka kan thawh a pawimawh a ni,” a ti bawk.