ZPM Thalai ten MPCC President thusawi an chhanglet

ZPM Thalaite chuan MPCC President Lal Thanzara’n May 15, 2025-a Lungpho khua a ZPM Sawrkarin Sawhthing a leina SCC a tlawhna ah, ‘MLA inthlan hnuhnung bera BJP ten ZPM Candidate te sum leh pai-a an puih avangin he sawrkar ah hian phut let an nei lian’ tia dawt a vawrhdarh kual chu pawi an tih thu nimin khan thuchhuah siamin an tarlang a. “MLA inthlan hnuhnung bera BJP in sum leh paia ZPM Candidate te a pui tih finfiahna Mizo mipui te hmuh a pholang ngei turin kan phut a, finfiahna a pholang thei lo a nih chuan thu diklo thehdarh tura zin kual tawh lo turin ZPM Thalai chuan kan chah duh a ni,” an ti.

Hei bakah hian ZPM Thalaite chuan MPCC President in Kuthnathawktu, Sawhthing chingtu a lainat thu a sawi chu, “Kum 20 chuang Mizo-rama Sawrkarna chelh tawh MPCC te hian tun ataka Sawhthing chingtute an lainat thar ta thut hi ZPM Thalai chuan mak kan ti a, an Sawrkar chhung khan NLUP-ah ringawt pawh vbc. sang tam tak hmangral siin Kuthnathawktute thlai thar engzat nge an leisak tih hi min chhanglet turin kan ngen a ni,” an ti a. “Danglam bik ZPM Sawrkar chuan a intiam ang ngeiin Kuthnathawktute Sawhthing a lei mek zel a, tun dinhmunah Quintal 113,627 lei tawhin, Kuthnathawktu te Bank Accounct ah Sawhthing chingtu tan vbc. 58.08 lai mai ZPM Sawrkar chuan a thun tawh a ni,” an ti bawk.