Digital Transformation Conclave vawi 17-na Chief Minister Lalduhoma hovin hman a ni

Nimin khan Aizawl Dawrpui Multipurpose Hall-ah ‘Digital Transformation Conclave’ vawi 17-na chu neih niin he hun hi Chief Minister Lalduhoma chuan khuallian niin a hmanpui a ni.

Mizoram sawrkar-a Department of ICT, Govconnect, Google Cloud leh Ilouge Media te tanghoin an buatsaih he Conclave hawnna hunah hian Chief Minister Lalduhoma chuan Internet kaltlanga mipuite hnena service pekchhuah tangkaizia leh awlsamna te, mipui leh sawrkar tana awlsamna thlen ve ve thei a nihna te an hriat avangin an sawrkar phat atangin Online Service lamah tan an la nghal tih sawiin, “Mipui Aw- Mizoram State Public Grievances Redressal & Monitoring System changtlung zawk kan hawng nghal a, a hnuah Kai Apps te, RAMP-MSME Facilitation Cell and Portals te, SDG Dashboard - Sustainable Development Goals lama khaw tin dinhmun hriat theihna tur te, MPLAN - Mizoram State Project Monitoring Dashboard te, e-RAM – mipuiten internet hmanga Revenue Department an dawrna tur te, online ILP system te, Aizawl Civil Hospital online OPD Card te leh thil dang dang kan kalpui zui zel a. Hmalakna dang sawi tur pawh a awm nual,” a ti a. “Tuna kan hmalakna langsar tak pakhat chu e-office kalpui tur kan inbuatsaih mek hi a ni. Artificial Intelligence, Cloud Computing, Cybersecurity leh Data Analytics thlengin, ram inrelbawlna leh mipuite tana hnathawhna kawngah a tul angin hma kan la zel ang,” tiin heng an hmalaknaah hian thalai thiamna nei te tan zau takin an inhawng tih a sawi bawk.

He hunah hian khual zahawm ICT changtu Minister Dr. Vanlalthlana chuan tunlai khawvel ah Artificial Intelligence hian mitin nun a khawih tawh tih sawiin, “Loneitu in a mamawh a, nu leh paten an fate venhimna hmanrua ah an mamawh a. Internet Service tinrengah thuk takin a inrawlh zel tawh. Tangkai taka mipuiten kan chhawr theih nan Internet service chak, mitin thleng phak kan mamawh a, cloud service lamah data him neih kan mamawh bawk. Viksit Bharat 2047 panna kawngah digital service hmalakna hi a pawimawh em em a ni,” tiin Conclave chuan Mizoram hmasawn zelna kawngah nasa taka a puih a beisei thu a tarlang bawk.

Conclave hawnna hi ICT changtu Secretary Amit Sharma IAS chuan kaihruaiin Chief Secretary Khilli Ram Meena IAS leh Director General of Police Mizoram Anil Shukla IPS bakah sawrkar laipui atanga rawn kal mi pawimawh hrang hrangte pawhin thu an sawi a. Chawhnu lamah official leh company mithiam kal khawm te hian digital service hmanga ram tana hmalak theihna sawihona an nei zui a ni.