ZPM sawrkar hnuaia hnathawh a tha tur a nih thu leh a thiam leh tling te lak an nih tur thu CM in a sawi

Chief Minister Lalduhoma chuan ZPM Sawrkar hnuaia hnathawh reng reng a tha tur a ni tih sawiin, Sawrkar hna lakah a thiam leh tlingte lak an nih zel tur thu a sawi bawk.

ZPM Party chuan nimin khan Aizawl-a an Party Office-ah Chhung Inkhawm neiin he hunah hian ZPM Leader leh Chief Minister Lalduhoma chuan ZPM Sawrkar hnuaia hnathawh reng reng a tha tur a ni tih sawiin, “Mipuiin beiseina sang tak nen min thlir a ni tih hriain, Contract hna a ni emaw, MLA Fund hmanga hnathawh reng reng kalphung thar mipui Sawrkar hnuaiah chuan a tha bik tur a ni,” a ti a. “Hna endiktu tur Party hrang hrangte awmna Mizoram State Monitoring Committee kan din a, anni hian rim takin an thawk mek a, hna tha lo te chu a tul anga action lak a ni a, kan la zel bawk dawn a ni,” a ti a. Hei bakah hian sawrkar hna lak chungchang pawh sawiin Chief Minister chuan, “Sawrkar hna lak chungchangah pawh a thiam leh tlingte chauh kan la zel dawn a, kan thalaite pawh taima taka lehkha zir tur leh thiamna tak tak neia kan ram tana mi chhen-fakawm ni turin ka chah a ni,” a ti bawk.

Zoram mipuiin Sawrkar thara rinna leh beiseina thar an nei chu lawmawm a tih thu pawh sawiin Chief Minister chuan, “Hei hian chakna min pe thin a ni. Famkimlo ni mah ila, kei leh ka thawhpuite nen theihtawp chhuahin kan ram tan chawl lovin hna kan thawk mek a, kan ramin hmasawnna hmel thar a hmu chho mek hi thinlung takin kan lawm em em a ni,” a ti a. “Ram rorelnaa Pathian ram tundin tumtu Party kan ni a, tlang hrang hranga kan lungrualpuite pawhin rilru thianghlim leh ram hmangaihna thinlung chhawm nung zel turin ka chah a, keini Party lo hi Zoram mipuite hian innghahna an nei tawh lo tih hriain, mahni hmun theuhah thahnemngai taka ram tana thawk zel turin ka chah a ni,” a ti bawk.

ZPM party in nimin-a Chhung Inkhawm an neih hi General Secretry Malsawmtluanga chuan kaihruaiin ZPM Thenzawl Vengthar Unit ten ZPM General Headquarters Office sak nan Rs. 10,000 Chief Minister an thawn chu Treasurer Lalchhuanthanga hnenah Chief Minister hian a hlan a. Tunhnaia an party hmalakna hrang hrangte ngaihthlak a ni bawk.