ITI Building himna turin Sub-Hqrs. YMA in hma la

Serchhip Bukpui ram-a Govt. Industrial Training Institute (ITI) Building chu Serchhip Sub-Hqrs. YMA chuan Inrinni khan a hmunah kalin misual kut tuar lova a him theihna turin hma an la nghal.
April 30, 2025-a Serchhip Sub-Hqrs. YMA Rorel Inkhawm vawi 5-na in Serchhip Bukpui-a ITI sak tawh hi a taka a function thuai theihna tura hmalak an rel angin Serchhip Sub-Hqrs. YMA hian Inrinni khan ITI Building sak zawh tawh hi an tlawh a, tun dinhmunah he Building hi peihfel thawkhat ni tawh mah se mi thenkhat a chhungah lutin Electric Wiring chu tihchhiat leh deuh vek a ni tawh a, hei bakah hian Tukverh te pawh an tichhe nual tawh a. YMA Sub-Hqrs. Serchhip hruaitute chuan mipuite chu hetianga building sak te hi tichhe mai lova humhalh turin an ngen a. Vawiin lam hian bungraw mamawh te lakhawmin Bukpui Branch YMA ten hnatlang neiin a chhunga luh theihna awm hrang hrangte hi pin a ni ang.

Serchhip Bukpui ram-a ITI hmun turah hian Building paruk (6) sak a ni a, heng te hi a lan danin Administrative Building leh Classroom bakah Hostel tur pahnih leh thawktute chenna tur pahnih niin a lang a. Hei bakah hian Gate siamin a hungna te pawh siam a ni a, amaherawh chu enkawltu an awm mumal rih lo nia langin heng Building-a Electric wiring chu tihchhiat leh deuh vek a nih tawh bakah tukverh leh darthlalang te pawh a chhe leh nual tawh a. A hmunhma a hnimin enkawl a tul hle niin a lang.