Ruihhlo ngaite enkawlna hrang hrang tan Sawrkar hriatpuina tih vek a ngai tawh dawn

Social Welfare Department in an hriat theih chinah Mizoram-ah ruihhlo ngai enkawlna hmun 46 a awm mek a, Social Welfare Minister Lalrinpuii chuan Mizoram-a ruihhlo ngaite enkawlna hrang hrang chu Sawrkar hriatpuina Accreditation tih vek a ngai tawh dawn tih a sawi bawk.

Social Welfare Minister Lalrinpuii hian nimin khan a Pisa-ah thuthar thehdarhtute kawmin SWD kaltlanga Mizoram Sawrkarin ruihhlo ngaite enkawlna, De-addiction & Rehabilitation Centre a kalpui dan leh a kaihhnawih te a sawifiah a. Social Welfare Department-in a hriat theih chinah tun dinhmunah Mizoram-ah Ruihhlo ngai enkawlna, De-addiction & Rehabilitation Centre 46 a awm mek thu sawiin, heng zingah hian Centre 11 chuan Ministry of Social Justice & Empowerment (MOSJE) atangin Fund dawng thinin ‘Integrated Rehabilitation Centre for Addicts’ (IRCA) tia koh an nih thu leh anni hian Ministry duan inkaihhruaina mumal tak (Minimum Standard of Care & Support) hmanga inenkawlna kalpuiin Ministry lam ten an rawn endik thin bakah Social Audit te pawh neih thin a ni tih a sawi a. Heng IRCA 11 zinga 5 te chu Aizawl-a awm niin heng bakah hian Thingsualthliah, Lunglei, Champhai, Kolasib, Chhingchhip leh Siaha-ah pakhat theuh a awm a. Heng Home 11 te bakah hian Private enkawl Home/Centre 25 leh Kohhan te enkawl Home/Centre 8 a awm thu a sawi bawk.

Drugs De-addiction Center(DDAC) la awmlohna District 5- Saitual, Khawzawl, Hnahthial, Mamit leh Lawngtlai-ah te DDAC dinna tur hi project proposal thehluh mek a nih thu leh Multidisciplinary & Research Center chu PISGAH, Thingsulthliah-a din tur leh Jordan Center bula Sawrkar ram awla De-addiction Center lian zawk dinna tur hi Ministry of Tribal Affairs (MOTA) ah thehluh a nih thu Minister chuan a sawi bawk.

Social Welfare Minister chuan Sawrkar in dan a neih, The Mizoram Drug (Controlled Substance) Act, 2016 leh The Mizoram Drug Treatment cum Rehabilitation Center Accreditation Rules, 2019 (and its subsequent amendments) hnuaiah Drugs De-Addiction Center/Rehabilitation Center te hian Sawrkarah Accreditation an tih vek a a ngai tawh dawn tih sawiin, “He dan hnuaiah hian Infrastructure, Human Resource, Service, Documentation etc ah Minimum Standards siam niin hetiang zawm lo chu Center din emaw kalpui phal a ni tawh lo ang,” a ti a. Accreditation hi Centre-te tihtawp tumna ngawr ngawr a ni lo tih sawiin, “Centre ten rualkhai zawk leh Ruihhlo ngaiten enkawlna an mamawh ang tak an dawn theihna tura awmze nei taka enkawlna kalpuina tur a ni zawk a ni,” a ti bawk.

Sethawn-a Jordan Center chungchang pawh Social Welfare Minister chuan sawiin, “Hei hi De-addiction Center atana hman reng thin kha a ni a. Tunah hian After-Care Skill Development Center atan kalpui tura ruahman mek a ni. Kohhran lamten enkawl hna hi an thawk thei em tih kan zawt mek a, PCI leh BCM te kan bia a, anni hian an kalpui theih loh chuan Sawkar in enkawl hna a chhunzawm ang. Hetah hian ruihhlo ngai sim tawh ten thiamthil chi hrang hrang zira, eizawnna tur an neih theih nan leh khawtlanga h mi pangngai anga an awm ve leh theihna tura ruahman a ni,” a ti bawk.

Hei bakah hian Kohhran pali ten an enkawl mek De-addiction Center te chu After Care Skill Development Course te nei tel nghal tura ngen an nih thu Minister chuan a sawi a. “Anni hian hetianga an kalpui theih chuan Sawrkarin Grants-in-Aid pek a inhuam a. Hei hi kan Chief Minister in a ngai pawimawh em em a ni,” a ti bawk.

Social Welfare Minister chuan Pathian kohna chhang leh Pathian rinchhana kal Centre mimal enkawl te lakah sawrkar in mawh a lak lem loh thu leh puih an mamawh chuan an puih thin thu a sawi bawk.