Vanapa Hall-ah Solo Art Exhibition buatsaih a ni

Information & Public Relations Department leh Mizoram Art Development Society tangkawp buatsaih ‘Solo Art Exhibition’ chu nimin khan Aizawl Vanapa Hall-ah neih tan niin I&PR Secretary Betsy Zothanpari Sailo chuan a hawng a, he Solo Art Exhibition-ah hian Artist Vanlalzarzova, Upper Republic kutchhuak pholan a ni a, tun thla ni 17 thlengin a duh apiang tan tlawh theih a ni ang. He Solo Art Exhibition hawngtu I&PR Secretary chuan artist thiam tak tak Mizoram in a neihte a theih ang anga chawikan chu a ngaihpawimawh thu a sawi a. Tunlai technology khawvel hmasawn zelin a hrinchhuah Artificial Intelligence hmanga lemziak hrang hrang awlsam taka siamchhuah a nih tak chungchangah heng AI hmanga siam tam tak karah hian mi zawng zawngin an siamchhuah ve theihloh mihring kutchhuak nge nge chu a hlut zawk thu a sawi bawk.