Tuikum lui atanga PHE Tui lakna pipe tha zawka thlak hna thawh mek a ni
Nimin khan Serchhip DC Meeting Hall-ah Serchhip District Water & Sanitation Mission chu an Chairman leh Bawrhsap Paul L. Khuma kaihhruaiin an thukhawm a, he hunah hian Member Secretary leh PHE Serchhip WATSAN Division-a Sr. EE, Isaac Lalchhuanmawia chuan tui leh thianghlimna kawnga an hmalakna hrang hrang tarlangin, Water Supply Scheme hman mek chei that leh tihchangtlun nan sum hman a nih thu a sawi a. Heng zingah hian Serchhip khawpui bikah nitin tui litre nuai 20 atanga nuai 24 inkar vel pump thin a nih thu sawiin, Pump House (Tuikum) atanga tuidahkhawlna hmunpui (Main Reservoir, Khawtetlang) thlunzawmtu Pipeline (rising main) hlui tawh chu pressure sang zawk do thei pipe hmangin thlak mek a ni a, he Pipeline hi KM 2.2-a thui niin tunah hian KM khat-a thui thlak a ni a. Hei bakah hian Main reservoir atangin tui a put tih hriat a nih thu leh a siamthat dan tur ruahman mek a nih thu a sawi bawk.
PHE-a Sr. EE chuan Jal Jeevan Mission (JJM) hnuaia Serchhip District-a hmalakna te chu za-ah za thawh zawh tawh a nih thu leh he Mission in a huam khaw 35 te chu Tui Connection pek tawh, ‘Har Ghar Jal Village’ ah puan an ni tawh tih a sawi a. JJM in a huam loh khua ah te Scheme dang hmanga hmalak mek a nih thu a sawi bawk a. NABARD sum atang te, AMRUT 2.0 leh NESIDS atanga sum hmuh hmangin JJM in a huam loh khua ah te Water Supply Scheme siam mek a nih thu a sawi bawk.
He thutkhawm ah hian Bawrhsap chuan tui leh thianghlimna hian kan hriselna a nghawng a, chu chuan hlawk zawka hna kan thawh theihna a hril a; mihring khawsak tih hmasawnna atana thil pawimawh a nih avangin District Planning Framework duan mekah pawh telh a nih tur thu a sawi a. He thutkhawm ah hian Serchhip District chhunga khaw thenkhatah tui hnianghnara dawng thei lo leh tui connection la peih fel lohna khaw tlem la awm chungchang sawiho niin Tuihna kam chak lutuk avang te, Scheme in Compensation a huam tel loh avanga ram chungchanga buaina awm te, a panna tur kawng siamna tur Scheme in a huam tel loh avanga harsatna awm te sawilan a ni bawk.
Swachh Bharat Mission 2.0 hnuaiah Serchhip District hi Mizoram chhunga ODF Plus (ODF+) ni thei hmasa ber District pathum zingah a tel a. Bawlhhlawh sawngbawlna tur hmun, Plastic (solid) Waste Managment Centre chu New Serchhip Lungrual ramah siam niin hman theih tura peihfel tep a ni tawh a. Darkar khata bawlhhlawh kg 45 halral thei tur ‘Smokeless Incinerator’ chu chah thlen tawh niin Mizoram-ah he khawl hi Serchhip District hian a hmang hmasa ber dawn a. Bawlhhlawh sawngbawlna hmun hi mipuiin tangkai taka an hman theih nan a huam chin khaw hrang hrangah kalin PHE Department te hian mipui an zirtir dawn a ni.