Artui tharchhuahna hmunpui tur lungphum phum
Heng puala inkhawm neih ah Chief Minister chuan nikum January ni 19 khan Shillong-ah NEC Plenary vawi 71-na ah an tel thu leh Mizoram in Artui lei nana sum kan sen nasatzia leh tharchhuah ve kan mamawhzia a zuk sawi thu a sawi a. “Mizo mipuiten artui hi kan ei nasa a, kan taksa tan pawh a tha a. Mahse kan tharchhuah ve loh avangin kumtin Artui lei nan hian cheng vbc. 22 chuang kan seng thin a, Artui tharchhuaktu State lamah kan pawisa hi a liam hnem em em thin. Chuvang chuan, kan mamawh zawng zawng thar theihna Farm kan din thei lo a nih pawhin engemaw zat kan lo tharchhuah ve dan tur tal kha dap tha ka ti a ni,” a ti a. Hemi atana AH&Vety Minister leh Official te nen ruahmanna te siamin, Thenzawl-ah hian din an titlu tih a sawi a, sum hi NABARD RIDF atangin cheng vbc. 20.64 vel puk rem an tih thu a sawi a, “Kan ram mamawh hmalakna, kan rilruin a vei thin bul kan han tan tur hi a phurawm a. Tha taka tihpuitlin kan tum ngei dawn nia”, tiin thawktute a chah a ni.
Chief Minister chuan Mizo Sial dik tak vulh punna an hawng nghal thei pawh lawmawm a tih thu sawiin, “Sial hi a tlatna tur ram nei tha tan chuan ran vulh awlsam, hlawk bawk si a ni a. A vulh theite tan he hmuna a chi tha kan lo tipung hi a hlu hle a ni,” a ti a. “Keimahni Mizo Sial breed ngei kan lo humhalh pawh kha a tha hrim hrim a. Kan pi leh pu te atanga kan rohlu kha an ni hrim hrim a, kan Culture-ah hian dinhmun pawimawh tak an luah a ni,” a ti bawk.
Artui tharna tur Farm an buatsaih turah hian Arpui nuai khat awm thei tur leh nitin artui 75,000 vel thar thei tura duan a ni a, a thawhna tur hi NABARD RIDF atangin cheng vbc. 20.64 dah a ni. Mizo Sial vulh punna hi Rashtriya Gokul Mission (RGM) 2023-2024 sum cheng nuai 430 senga din a ni a. Civil Works bikah cheng nuai 253.50 dah a ni a. Contractor hi Architecture Interior Engineering Construction an ni.
Zo Sial te hi inthlahpawlh an tam tawh avangin an pianphung pawh nasa takin a danglam chho a, Breed Development and Conservation Centre-ah hian Zo Sial chi tha, performance tha zawk tharchhuah tum a ni a, Semi-Intensive a vulh tur niin Sial 100 thleng vulh theihna tura ruahman a ni. Bailey Bridge siam tur hi Dilpui an tih maiin a Dil laili a thliarkar a siam kalpawhna tura dawh a ni a. Dil ral lehlam a ranchaw chinna hmun kalpawhna a ni nghal bawk. Hna hi NABARD sum cheng nuai 83 senna tur niin Lei hi pahnih dawh tum a ni.