Serchhip Police ten document lem siamtu a puh an man

Serchhip Police te chuan Document (Tribal Certificate) lem siamtu a puh chu manin thubuai siam sak a nih hnuah niminpiah khan Serchhip District Jail-ah dah a ni.
Thudawn danin tunhnai khan Serchhip District chhung Keitum khuaa mi pakhat chuan Serchhip DC Office-ah Aadhar Card lak a tum a, hemi atana Tribal Certificate a thiltel chu a lem (fake) nia rinhlelh a nih avangin Serchhip DC Office-a SDO (Sadar) chuan Serchhip Police Station-ah FIR a thehlut a, Serchhip Police te hian SP remtihna hmanga an chhui hnuah dan dik lo-a thil tih a awm ngei nia hriain thubuai ziaklutin uluk takin an chhui zui a, he Tribal Certificate hi a lem ngei a ni tih finfiahin, Tribal Certificate lem siamtu nia hriat C. Zosangpuia (46), Keitum Venglai chu manin thubuai siamsak a ni.

Tribal Certificate lem siamtu a puh C. Zosangpuia hi tunhma lam pawhin Serchhip DC Office-a thawk tawh thin niin document lem kaihhnawih avang hian a hna atang hian ban a lo ni tawh nia thudawn a ni a, Common Service Centre (CSC) License neiin Keitum khua ah hian CSC kaltlanga document pekchhuah theih hrang hrang te Dan angin a pechhuak thin a. Tunhnaiah an khuaa mi pakhat, ramdang a hnathawk a kal tur chuan Aadhar Card mamawhin hemi kaihhnawiha hman tura Tribal Certificate lem an siam chu manchhuah a ni ta niin thudawnna chuan a sawi.

Serchhip Police te chuan Tribal Certificate lem an siam sak hi Keitum khuaa mi bawk a nih thu an sawi a, CSC kaltlang hian Tribal Certificate hi Rs. 50/- a siam tir thin a nih thu leh tuna a lem hi pakhat Rs. 120/- a siamtir a nih thu an sawi a. Hetianga document lem siam hi thiamloh chantir an nih chuan kum 7 (sarih) thleng lung In tantir-a hrem theih an nih thu an sawi bawk.