TRC Accreditation-ah hma la

Mizoram Drug Treatment cum Rehabilitation Centre Accreditation Meeting chu nimin khan Social Welfare, Women and Child Development Department-a Commissioner & Secretary Lalzarmawii hovin Secretariat Conference Hall-2 ah neih a ni. Mizoram a ruihhlo ngai enkawltu ten rualkhai leh mumal zawk a inenkawlna an kalpui theih nan Department lam chuan ‘Mizoram Drug Treatment cum Rehabilitation Centre (TRC) Accreditation (Amendment) Rules 2020’ a buatsaih tawh a, he rules hi sawihova hman theih nghal dan tur ngaihtuah a ni. He Accreditation hian Mizoram pum a huam dawn avangin District tin ah ‘Accreditation Inspection Team’ chu a din tawh a, anni hian an huamchhunga de-addiction Centre te tlawhkualin an dinhmun an zirchiang hmasa anga, chumi a zir chuan Accreditation ngaih-tuah sak an ni dawn a ni.