Bawrhsap hovin Serchhip District Jail tlawh a ni
Mizoram sawrkar in Serchhip Bawrhsap bakah Superintendent of Police leh Chief Medical Officer (CMO) te chu Serchhip District Jail tlawh tur leh an thil hmuh dan kimchang chu Mizoram State Legal Services Authority-a thehlut tura a tih angin nimin khan heng mi pawimawh te bakah District Legal Services Authority-a Secretary Josangzeli Tlau te chuan Serchhip District Jail hi an tlawh a, District Jail Superintendent, C. Lalbiaktluanga leh a thawhpui ten lo dawngsawngin Serchhip District Jail chhung leh Ward hrang hrang, Mipa leh hmeichhe awmna hmun te an enfiah a, Bawrhsap chuan Jail inenkawlna chu tha a tih thu leh an hmunhma te pawh an vawnfai that thu sawiin, Jail-a awm mek te chu helai hmuna an awm chhung hian insiamtha tur te, nunthar neia chhuak tur leh harsatna an neih te chu Pathian tihna nen hmachhawn turin a chah bawk a ni.
Tun dinhmunah Serchhip District Jail-ah hian Jail tang mi 62 awm mekin an zinga 59 chu mipa niin hmeichhia pathum an tang bawk a, Jail tang zinga mi 35 te hi an thubuai ngaihtuah tawh leh thiamloh chantir tawh te niin midang 27 te chu an thubuai ngaihtuah lai mek an ni.