Sawrkar-ah aikal la an awm tawh loh kan beisei a, an la awm chuan action lak nghal tur - Chief Minister

Chief Minister Lalduhoma chuan Sawrkar ah aikal la an awm tawh loh an beisei thu leh an la awm a nih chuan action lak nghal tur a nih thu sawiin, “Sawrkar hnathawkte hian hun kan vawng dikin kan hlawh phuin hna kan thawk tur a ni,” a ti bawk.

Nimin khan Aizawl-a Secretariat Conference Hall-ah Environment, Forest & Climate Change Department te hnathawh dan thlirletna hun neih niin he hun hi Chief Minister Lalduhoma chuan a hmanpui a, he hunah hian Chief Minister chuan Sawrkar ah aikal la an awm tawh loh an beisei thu sawiin, “An la awm chuan action lak nghal tur. Hun kan inpe rei tawk tawh,” a ti a. “Biometric Attendance tha taka kalpui kan duh a. Sawrkar hnathawkte hian hun kan vawng dikin kan hlawh phuin hna kan thawk tur a ni. Service Review Committee te pawhin hna an thawh tawh hlawm kan beisei a, chhawr tlak ngang loh hnathawktu chu Special Pension kha pek mai tur a ni,” a ti a. “Officers thenkhat sawrkar facilities mahni kawl theih chin (entitled) bak lo kawl kan la awm chuan kan sawi tawh thin angin lo kir vek se a finthlak ang,” a ti bawk a. e-office chu kalpui tumin an inpuahchah mek tihm pawh sawiin, “Sawrkar hnathawkte kan intuaihriam ve reng a tul tih hria ang u. Contract inpekna kawngah miin a duhsak zawng ringawt a pek thin loh nan Integrity pact kan siam a, zawm vek kan tum dawn nia,” tiin a chah bawk.

Chief Minister chuan hmasawnna hnathawh dawnah Forest Clearance hi lak zel a ngaih avangin hmasawnna hnathawh chak taka an kalpui theih nan lo tanpui thin turin EF&CC Department-a thawktute chu chahin, “Kan ram hian hmasawnna hmel thar hi hmu thuai thuai se kan duh a ni,” a ti a. “Project reng reng hi Planning Department hriatpui lova kalpui kan rem ti lova. Planning Department-ah thlen zel tur a ni. Department ten inhre tawn lovin Project inang tak tak te, inhnaih tak tak te kan kalpui hian ramin a hlawkpui tur angin a hlawkpui loh phah thei,” a ti bawk.

He hunah hian EF&CC Officer ten an hmalakna leh hnathawh te tarlangin, an report atangin Chief Minister-in hriat belh duh a neih te, zawhna a neih te zawtin, hmalak zui zel dan turte an sawi nghal zel a. He huna tarlan a nih danin December 2023 atanga nimin thlengin Forest Clearance 12 pek a ni a, project 5 te a thuphung a pawm (inprincipal approval) an ni tawh. Project 3 chu approve tawh sa, penal NPV pek loh an awm thung. Project pahnih clearance chu Ministry of EF&CC lam nghah mek a ni a, an dilna lehkha a fel fai tawk loh vanga nghah mek (pending) project pathum an awm a, Mizoram State CAMPA Fund ch cheng vbc. 199 a awm mek bawk a ni.