Sairang-ah Rel a lut ta

Bairabi leh Sairang inkara Rel kawng siam mekah Sairang thlengin Rel tlan tir chhin a ni ta.

Indian Railways tarlan danin, India ram zalen hnua a vawi khatna atan Aizawl dai, Sairang thleng tura Rel kawng siam mekah tunkar Nilaini khan Northeast Frontier Railway ruahmannain Rel tlantir chhin hi hlawhtling taka neih a ni a, Rel hian kilometre 51 chuang zawhin Bairabi atangin tluang takin Sairang a thleng a, nimin khan a vawi hnih nan Rel hi tlantir leh a ni bawk.

Sairang thlenga Rel luhtir hi Sawrkar laipui policy pawimawh, Act East Policy tihhlawhtlinna pakhat niin inkalpawhna tha leh tlawm bakah sum leh pai dinhmun tihhmasawn nana hmarchhak State te thlunzawm chu a tum ber a ni a, he Rel kawng ah hian Station pali- Hortoki, Kawnpui, Mual-khang leh Sairang-Sihhmui Station awm tura ruahman niin, Leiverh 32, Lei lian 55 leh Lei te deuh 89 a awm dawn a ni.

Sawrkar laipui tarlan danin, kumin March thla thleng khan Bairabi atanga Sairang Rel kawng siam hna hi zaa 95 zawh tawh a ni a, sum ruahman cheng vbc. 8215 atangin cheng vbc. 7714 hman zawh tawh a ni a, tun thla leh June thla ah endikna hnuhnung neih a nih zawhah July thla ah hawn theih tura peih hman beisei a ni.