Inquiry Committee din MZP in lawmawm an ti

Mizo Zirlai Pawl (MZP) chuan Sericulture Demonstrator tur lak dan chhui tura Inquiry Committee din a ni chu lawmawm an tih thu an sawi.

Nimin a thuchhuah an siamah MZP General Hqrs. chuan Sericulture Department hnuaia Sericulture Demonstrator post 4 hawhkhat tura hna lak danah thil diklo awm ngeia a hriat avangin May 13, 2025 khan thuchhuah an siam thu leh hna lak dan chhui phutin Inquiry Committee din turin sawrkar an ngen thu an sawi a. MZP ngenna anga Sericulture Department chuan Inquiry Committee a din nghal leh Inquiry Committee-ah Department mi leh sa ni lo, Department pawn lam mi an ruat chu lawmawm an tih thu sawiin, Inquiry Committee tena an thil chhui leh an thil hmuhchhuah chu nghâkhlel taka an thlir thu leh uluk takin an zirchian leh dawn thu an sawi a. He Committee hi ni 30 chhunga report peih hman tura beisei a nih thu an sawi bawk.

Tarlan tawh angin Sericulture Department hnuaia thawk tur Sericulture Demonstrator post 4 lak danah thil dik lo taka kalpui nia an hriat thu MZP te hian an lo sawi tawh a. He hna lakna turah hian February 17, 2025 khan Advertisement tihchhuah niin mi 38 ten April 8 leh 9 khan Exam beiin May 7 khan personal Interview neiin mi 4 lak an ni a. MZP te chuan he hna lakna ah hian Examination Hall-ah Mobile Phone kenluh a nih thu leh Exam beitu thenkhat ten Complaint mahse exam hi kaltlang luih pui nia an hriat thu sawiin, hei hian The Mizoram Direct Recruitment (Conduct of Examination) Guidelines 2018; Sl. No. 24- Instruction to Candidate; Sl. No. 27- Dutes of Invigilator te a kalh ngeia a hriat avangin chhui an phut thu an sawi a. Hetiang hna lak diklo sawi tur a awm fo thin chu pawi an tih thu pawh sawiin, hna lakah a thiam leh tlingte lak thin nise tih chu MZP duh dan a la ni reng tih an sawi a Zirlai hna zawng mekte thlavang a hauhin hma an lak zel dawn thu te pawh an sawi a ni.