Mizoram Engineering College atan post 63 siamna tur Council of Ministers in an pawm
Mizoram sawrkar-a Council of Ministers chu nimin khan Chief Minister Lalduhoma kaihhruaia thukhawmin thu pawimawh hrang hrang an rel a. Mizoram Engineering College, Pukpui, Lunglei atan post 63 siamna tur chu pawmin The Mizoram Provisional Employee Saving Scheme, 2024 pawh an pawm bawk.
Nimin-a Cabinet Meeting Room-a Council of Ministers thukhawm hian Mizoram Engineering College, Pukpui, Lunglei atana post 63 siamna tur chu pawmin kum 2019 khan Mizoram Engineering College hi Prime Minister-in a lo hawng tawh a. Amaherawh chu, a panna kawng te, tui connection leh electric connection te a la awm loh avangin a taka function theih a ni lo a. Tun sawrkar hian a panna kawng leh connection pawimawhte tih nan cheng vbc. 4.9 a sanction bakah hnathawktu Post 63 lakna tur hi a pawm ta a ni. Hei bakah hian The Draft Industrial Policy of Mizoram -2025 chu pawm a ni a, Industrial Policy hi kum 1989, 2000 leh 2012-ah te siam a lo ni tawh a. Tunlai mil tura tha zawk leh changtlung zawkin, investor te hip lehzual thei turin Industrial Policy 2025 hi siam a ni.
Council of Minister thukhawm hian Provisional Employees Association hrang hrang te duh danin The Mizoram Provisional Employee Saving Scheme, 2024 siamthatna tur pawmin Mizoram Cooperative Societies Rules, 2012 siamthatna tur an pawm bawk a, Mizoram School Education Department (Terms and condition of appointment of teaching & non-teaching staff of provincialized school) Rules, 2023-a Rule 3(ii) siamthatna tur pawh an pawm a. Fire & Emergency Services-a Assistant Chief Fire Officer leh Divisional Fire Officer siamna tur pawmin Mizoram Water Supplies (Control) Rules, 2023 siamthatna tur an pawm bawk.
Heng bakah hian Draft Mizoram Civil Services (Combined Competitive Examination) Rules, 2025 pawmin Optional paper awm tawh lo tura tih a ni a. Zirna In thenkhat te dinhmun sang zawka hlankai theihna tura Dan awmsa atanga ngaihnathiamna tur pawmin, Aizawl Smart City Limited chu kum khat dang la kalpui leh tura tih a ni bakah thu pawimawh dang thenkhat te an pawm bawk a ni.