Sawhthing sawngbawl sawiho

Nimin khan Chief Minister Lalduhoma hovin Sawhthing Slice Dry kalpui mek chungchang chu Cabinet Room-ah sawiho a ni a, he hunah hian Agriculture Minister PC. Vanlalruata, Industry Minister F. Rodingliana leh sawrkar mi pawimawh dangte an tel a. Tunah hian MAMB chuan Local entreprenuer 13 te chu Sawhthing Slice Dry kalpui turin a thawhpui a, anni ho nena chak zawka kal dan tur leh an inbunna tur zar pharh dan te an sawiho bakah Mizorama Processing Unit rawn din duh, India ram chhung leh ram pawn firm paruk te chungchang an sawi bawk a, heng firm te mamawh hi hriatsak a, an inbun duhna hmun te hriata, a tul anga chak taka hmalak an rel a, a umzuitu tur Committee an siam nghal bawk.

He hunah hian Sawhthing lei tawh chin report ngaihthlak a ni bawk a. Notified crops palite lei nan sawrkarin MAMB-ah cheng vbc. 62.599 a dah tawh a. MAMB hian sawrkarah cheng vbc. 20 an dil belh leh mek a. DAMC lama Third release thlenga pawisa pek tawh chu Rs. 58,08,00,100 a ni. Tun thlengin Sawhthing lei tawh zat chu quintal 1,13,627 a ni a, a then hi direct purchase leh a then support price hmanga lei an ni. An hralh lehna atangin MAMB hian Rs. 6,34,63,875 a hmu let ve tawh thung a ni.