Minister in Serchhip Mat phai-a thlai chinna leh Serchhip-a DHO leh DVO Office te a tlawh

Horticulture Department changtu Minister C. Lalsawivunga chuan nimin khan Serchhip Mat phai-a thlai chinna hmun tlawhin loneitute nena inkawmhona an neih bakah Serchhip-a District Horticulture Officer (DHO) Office leh District AH & Vety Officer (DVO) Office te a tlawh nghal bawk. 

Horticulture Minister hian nimin khan Serchhip leh Thenzawl inkar Zuangleng ram-a Centre of Excellence for Vegetables dinna tur hmun chu tlawhin hemi hnu hian Serchhip Mat Phai-a thlai chinna hmun hrang hrangte chu a hmunah tlawhin Mat lui kam-a Nul siamtute hnathawh dan a hmunah a enpui a. Chhungkaw 160 velin eizawnnana an hman Chawm zau, Vaivenga zau, Chamdur leh Tuisen zau te a fangkual nghal bawk a. Loneitute hnathawh leh hmalak dan te enpuiin, Farming Society hruaitute nen an inkawm a. Horticulture farmer ten harsatna an tawh te leh mamawh an neih te Minister hnenah hian an thlen bawk a ni.

Hemi hnu hian Serchhip-ah rawn lutin Chanmari Veng-a District Horticulture Officer (DHO) Office chu a tlawh a, he hunah hian Minister hi Serchhip DHO R. Lalrintluanga leh a thawhpui ten lo dawngsawngin Horticulture Department Director CH. Lalmuanpuia kaihruainain thawktute nen inkawmhona an nei a, he hunah hian DHO R. Lalrintluanga chuan Serchhip District chhunga an Department hmalakna hrang hrang a tarlang a ni. Minister chuan ram intodelh lo kan la nih thu sawiin, kan intodelh theih nana Department in hma a lakna chu a chhuanawm takzet tih a sawi a. Dawhkan-a hnathawktu mai ni lova a taka a hmuna thawktu an nei chu a lawmawm tih a sawi a. “Loneitute kan kaihhruai thiam phawt chuan hlawk zawka thawk thei leh remhre zawkah kan chhuah thei ang,” a ti a, Kuthnathawktute dawmkang a, puitu ni zel tura chahin, “Kut hnathawktuten kan ngaihsak a ni tih an hriat hian nasa takin hma an sawn phah ngei ang,” a ti bawk. 

Horticulture Minister hian Serchhip DHO Office-ah hian Pa chi - Mushroom Spawn siam chhuahna Laboratory an neih chu a tlawh a, he Laboratory atang hian farmer te leh Pa ching duh apiang ten awlsam takin Pa chi an lei thin a ni.

Hemi hnu hian Minister hian a Department chan pakhat, AH & Vety Department-a Serchhip District AH&Vety Office, P&E Veng chu a tlawh leh bawk a, District AH & Vety Officer Dr. H. Vanlalrawna leh a thawhpuiten lo dawngsawngin an hmalakna chungchangte a sawipui bakah thawktute chenna tur quarters sak mekte a tlawh nghal bawk a ni.