MUHCS atan sum ngaihtuah zel tum niin inziaklut 2,549 an awm tawh
Health Minister Lalrinpuii chuan Mizoram Universal Health Care Scheme (MUHCS)-ah a tul angin sawrkarin sum a ngaihtuah zel dawn tih sawiin, sum lamah thlaphanna tur a awm lo tih a sawi a. MUHCS kalpui hnuah inziaklut 2,549 an awm tawh nia chhinchhiah a ni.
Health Minister Lalrinpuii chuan Mizoram Universal Health Care Scheme (MUHCS)-ah hian Corpus Fund atangin sum dah a ni tih sawiin, a tul angin Lottery atangin dah tum a ni bawk tih a sawi a. Hei bakah hian ADB atangin loan hmuh beisei niin Bank nen thawhhona siam a nih bawk avangin thlaphanna tur a awm lo niin a sawi a. Sawrkarin sum lo nei tam lo deuh pawh nise thlaphanna tur a awm lo tih sawiin, “Financial back up kan nei tha a, Bank nen inremna siamin sawrkarin damlo inenkawlna sum hi a pe thei ta lo a nih pawhin Bank-in an pe thei dawn a; chuvangin, nei tha tawkah kan inngai a ni,” a ti bawk.
Health Minister chuan MUHCS atan sawrkar chu a inbuatsaih chho zel tih sawi bawkin, “ZMC&H-ah Cabin 30 siam a nih bakah khum 50 kan nei thar a. Aizawl khawpui chhunga UPHC panga ah damlo admit theih vek a ni a. Tun atanga hun reilo te-ah RIPANS-ah khum 100 kan nei dawn a, Siaha, Lunglei leh Champhai damdawi In-ah ICU dah thar tum a nih bakah Civil Hospital, Aizawl-ah Cath Lab Building sak mek niin an pual hian Ward pawh neih tum a ni,” a ti bawk.
Mizoram Health Care Society (MHCS) thawktute sawi danin MUHCS kalpui hnuah inziaklut 2,549 an awm tawh a, inziaklut an tlem chhan zawhna chhangin, “Inziah luh hun hi la hawn mek zel a nih avangin tun dinhmunah tlem angin lang mah se an la pung zel turah kan ngai a. Inziaklut an tlem chhan nia lang hi Golden Card neite inziahluh an ngai lova, anni bakah sawrkar hnathawk leh pensioner-te an inziahluh a ngaih loh bawk avangin a tlem angin a lang a ni,” an ti. MHCS thawktute sawi danin Golden Card nei hi chhungkaw 2,18,000 vel awmin mihring nuai 8 vel huam ah an ngai a. Sawrkar hnathawk mek hi mi 42,000 vel awmin hetah hian mi 1,60,000 vel bakah pensioner mi 34,000 vel an awm bawk avangin Mizoram mihring mi nuai 12 vel atanga chhutin inziaklut tur hi an tam lo hrim hrim niin an sawi bawk.
Mizoram Health Care Society-a thawktute chuan tun dinhmunah MUHCS cashless hmangin kar tin Bill an pe niin an sawi a. April thla chhung khan damlo mi 3,492 te bill cheng vbc. 2.8 chu an pe tla vek tih an sawi a, Bill hi kar tin an pe niin an sawi bawk.