LADC-ah CEM thar lalutin sawrkar thar din a ni

Lai Autonomous District Council (LADC) Chief Executive Member (CEM) atan nimin zing khan MDC N. Zangura chu rinawmna thu tiamtira lakluh a ni.

CEM lakluhna inkhawm hi LADC-a Executive Secretary K. Lalthanzara’n kaihruaiin CEM lakluhna ah hian United Democratic Alliance (UDA) a tel MDC te bakah BJP hruaitute leh Official pawimawh zual te an tel a, CEM lakluh tur hi Lai Students' Association (LSA) ten dan an tum ni a hriat a nih avangin LADC Office Complex, Council Veng leh New Vengpui-ah te chuan BNSS hnuaiah ni 2 chhung punkhawm khap a ni.

CEM thar N. Zangura chuan CEM atan lakluh a nih hnuah a pisa luah nghalin a kaihhruai Sawrkar indin chhoh danah felhlel leh fuhlo a awm nia ngaitu mi thenkhat an awm tih sawiin, dan dinglai palzutna an neih loh thu leh duhthlanna an neih hmangin Sawrkar an din thu a sawi a, mimal hamthatna leh duham vanga Sawrkar din an nihloh thu leh a kaihhruai Sawrkar chuan theihtawp chhuahin hmasawn turin hna a thawh tur thu a sawi bawk.

Tarlan tawh angin, LADC-a sawrkar mumal a din theih loh avangin boruak a inlumlet chho reng a, tunhnaiah BJP leh MNF thawhdunna, United Democratic Alliance (UDA) in CEM atana an thlan MDC N. Zangura chu Governor in CEM atana a ruat hnuah Larsap chuan niminpiah khan thuchhuah siamin a thupek lo siam tawh, LADC CEM atana V. Zirsanga ruatna chu a thiat leh a, ZPM Legislature Party Leader V. Zirsanga kaihhruaiin kum 2025 – 2026 Budget an passed tawh pawh a thiah sak a, Governor chuan CEM thar N. Zangura’n thuneihna a lak hma chu hmalakna thar awm tawhlo turin thu a chhuah a ni.

Heti hian tun dinhmunah LADC-ah hian BJP-a MDC pahnih, MNF-a MDC 11 leh anmahni thlawptu Congress MDC pakhat te chuan BJP kaihhruai United Democratic Alliance (UDA) dinin sawrkar thar an siam ta a, UDA-ah hian Member 14 an awm a, ZPM in MDC 11 an nei ta bawk a ni. BJP Mizoram chuan MADC-ah sawrkarna an chan mek thu leh CADC-ah pawh BJP sawrkar tha tak a awm thu sawiin, “LADC-ah BJP kaihhruaina hnuaiah Sawrkar thar ngelnghet tak UDA Sawrkar a ding leh tur hi BJP nihna leh awmze thuk tak tarlanna ah kan ngai a, chhimlam unau te hi Politics tak tak ngaihtuah a, nasa taka rilru seng thin an ni,” an ti bawk.

Hetihlai hian Lai Student’s Association (LSA) chuan nimin khan thuchhuah siamin LADC-a CEM lakluhna mipui hriatloha buatsaih chu Lawngtlai District mipuite zahlohna a ni tih sawiin, hriatthiam harsa an ti tih thu leh a tul angin hma an la zel dawn tih an sawi bawk a ni.