Kolasib MJA leh YMA ten Bawrhsap hovin hnathawk mek leh Police Duty-na an tlawh

Kolasib District MJA leh YMA Sub-Hqrs. Kolasib hruaitute chuan nimin khan District Bawrhsap Robert C. Lalhmangaiha hovin an District-a kawng siam thenkhat leh ramri-a Police te duty-na hmun an tlawh.

Kolasib Bawrhsap hova thawkchhuak MJA leh YMA te hian Bilkhawthlir leh North Chawnpui inkalpawhna siam mek tlawhin Bawrhsap chuan he kawng hi Bukpui tlangdung, Saipum leh Saiphai thleng in an hman piahlamah kumin kumtawp lamah YMA Inkhawmpui Lian Sakawrdai a awm tur atan inkalpawhna kawng pawimawh tak pakhat a ni dawn tih a sawi a, chuvang chuan a hma thei ang bera kawng tha neih chu a pawimawh takzet tih a sawi a. Contractor te pawh lungtha hmang tura chahin, Fur ruahtuiin a tihchhiat nghal mai theih loh tura tlo taka siam turin a hrilh a, an hnathawhna tibuai thei tur thil te sawrkar ah thlen hreh lo turin a hrilh bawk.

Bilkhawthlir atanga North Chawnpui panna kawng hi PMGSY 2.0 hmanga siam niin KM 17.6 leh meter 3 a zau tur a ni a. A kawng siam nan hian cheng nuai 2421.49 sanction a ni. Kawng hi siam zawh tawh ni mahse, kawng chhe lai a awm nual avang hian Contractor te hian an Defect Liability period, kum 5 chhung a zawh hma chu kawng hi an enkawl rih a ni.

Kawngpui bakah hian Cheppui leh Chepte a Lei dawh mek pawh en nghal niin, Cheppui hi dawh zawh tawh a ni. Chepte Lui-a lei dawh mek hi nikum lama dawh zawh tawh tur ni mah se khawtlang hruaitute ngenna angin a hmun sawn a nih avang leh a foundation lei a nem avangin lei dawh tur hi ruahman (design) thar leh a ngai a. Detailed Project Report (DPR) siam thar leh niin tunah hian NABARD lamin an sanction leh hnai tawh a, hna tan leh thuai tum a ni.

Hei bakah hian Saihapui ‘V’ a Border Outpost tlawh nghalin SDPO Lalnunpuia leh Police duty te nen an inkawm a, Bawrhsap chuan helai hmuna Police duty te chu a fuih bawk a ni.