Family Guidance & Counselling Centre pantu tam

Mizoram Synod-in harsatna chi hrang hrang nei te pan tur leh an harsatnate chinfelpui tura a din, Family Guidance & Counselling Centre (FG&CC) chu pantu chu mi 79,723 an awm tawh a, a pantu zingah hian mipa aiin hmeichhia an tam zawk.

Zalen in Synod FG&CC thawktute hnen atanga thu a dawn danin Mizoram hmun hrang hrangah Centre hi pakua (9) awmin heng zingah hian nikum kum tawp thleng khan pantu hi mi 79,723 chhinchhiah a ni a, Centre zingah hian Main Centre, Mission Veng pantu an tam ber a, Main Centre pantu hi mi 47,189 an tling a, hei hi hmun hrang hranga Centre pantu zawng zawng 79,723 atanga chhutin 59.19% a tling a ni. Main Centre dawt ah hian Champhai leh Bawngkawn Centre-te chu pan tam zual an ni.

Zawhna chhangin FG&CC thawktute chuan anmahni pantu zingah chhungkuaa harsatna thleng chu a tam ber tih an sawi a, Chhungkuaa harsatna thleng zingah hian nupa kar buaina avanga pantu an tam hle bawk a, nupa kar buaina chhan chi hrang hrang zingah sum leh pai chungchang te, Sakhaw rin dan inang lo chungchang te leh ngaihzawng chungchang te chu a langsar zual a ni tih an sawi. Nupa kar buaina dawtah hian ruihtheih thil vanga buaina chu pahnihna niin a dangte chu pawikhawihna chi hrang hrang, naupan laia mipat hmeichhiatna khawihsak, rilru lam harsatna, zirna chungchang leh piantharna/thlarau lam nun te an ni tlangpui tih an sawi.

FG&CC thawktute chuan anmahni pantute zingah kal nawn fo an awm laiin tum khat chauh kal pawh an awm niin an sawi a. Main Centre, Mission Veng bik hi chawhrualin ni khatah mi pariat atanga sawm (10) velin an pan thin tih an sawi a. Hetah hian Counsellor pali, Clinical Psychologist pakhat leh Pastor pathum an thu thin a, a pantute hian an duh zawng an thlang thei a. Hmun danga Centre-ah chuan Counsellor hi pakhat chauh an awm a ni. FG&CC thawktute chuan anmahni pantute hming leh nihna chu thup tlat a ni tih pawh sawiin, a ruk thei ang berin an harsatna te lo ngaithlain a sutkian dan tur an zawnpui thin niin an sawi a. An Centre pantute chu an harsatna tawh dan a zirin Counselling leh tawngtaina nen hun an hmanpui thin tih an sawi a. An hnen pantute chuan an hlawkpui thin hle nia an hriat thu an sawi bawk.

Kum 1995-a Synod Inkhawmpui chuan FG&CC din hi a rel a, January 21, 1997 khan Synod Conference Centre-ah bultan niin tunah hian Mission Veng (Headquarters/Main Centre) bakah Vaivakawn, Bawngkawn, Mamit, Serchhip, Champhai, Lunglei, leh Khawzawl-ah Centre hi kalpui mek a ni a, April ni 1, 2009 atanga September 15, 2016 chhung khan Chanmari Centre kalpui a ni bawk.