Agriculture & Farmers’ Welfare Department hmalakna Minister hovin thlirlet a ni

Mizoram sawrkar-a Agriculture & Farmers’ Welfare Department chuan ni hnih awh tur an hmalakna thlirletna hun chu nimin khan an hmang tan a, Agriculture Minister PC. Vanlalruata chuan a hmanpui a ni.

Directorate of Agriculture & Farmers’ Welfare Committee Room-a he hun hman ah hian Minister chuan Agriculture & Farmers’ Welfare Department chu Zoram mipuite mit fukna, Department pawimawh tak a ni tih sawiin, Thlai enkawltute tan a sawrkarin hmalakna tam tak a lo neih ve tawh thinah, a then fuh lo te pawh a awm ve thin thu leh chung fuh lo te chu siam that zel tum anih thu a sawi a. Agriculture hmasawnna atana hmalakna hrang hrang chhunzawm loh leh hlawhtling zo lo awm thin te chu pawi a tih thu sawiin, “Sawrkar hruaitu te, Department a thawkte leh tanpuina dawng thin farmer te thlengin he thil ah hian kan inenfiah tlan a ngai a ni,” a ti. He hun a kalkhawm Agriculture Officer te chu an mahni hna chanpual theuh te ti khawtlai lovin, a rang thei ang berin hma la nghal zel se a duh thu a sawi a. Tlangram loneitute nasa lehzual a ngaipawimawh a, an hmasawnna tur a ruahmanna thar tha tak ngaihtuah chhuak tura a duh thu te a sawi bawk.

He hunah hian Agriculture Secretary Ramdinliani pawhin Agriculture Department chu Department upa leh hlun tak a ni tih sawiin, Department in hmalakna tam tak a neih thin te chu kimchang taka documentation neih thin nise a ti a. Department hmalakna te chu mi te hriat theih tura phochhuak tam tur leh kuthnathawktu te tana tangkai thei tur Scheme hrang hranga hmalakna te pawh nasa lehzuala thehdarh turin kalkhawm te a chah a. Line Department dang te nen nasa lehzual a Convergence kalpui turin a chah bawk.

Agriculture & Farmers’ Welfare Department hmalakna thlirletna hun hi Director R. Lalnunzira chuan kaihruaiin District hrang hranga DAO ten report an pe a, Agriculture Department hnuaia scheme hrang 15 te thlirhona leh sawihona neih a ni.