FA Airlines in CM an kawm

Chief Minister Lalduhoma chuan nimin khan a Pisa-ah FA Airlines-a Managing Director Prof. Fauzia AA Arshi chu kawmin Mizoram nena thawhhona tur ruahmanna an rawn neih te a sawipui a. Chief Minister chuan Cargo lama thawhhona neih tha an tih thu leh an rawtna te chipchiar taka an hriat hmasak a ngai tih sawiin, “Ziakin kim-chang takin rawn thehluh ula a tha ang,” tiin FA Airlines ten Mizoram sawrkar thawhpuia an sawmna hi a lo chhang a. Nimin vek khan an ruahmanna te hi GAD changtu Commissioner Vanlaldina Fanai hnenah chipchiarin an thlen dawn a ni. Prof Fauzia Arshi hian Mizoram mawi tak chu khualzin ten awlsam zawka an tlawh theih nan te, Mizoram tharchhuah organic thlai zau zawka zawrh chhuah nan te, a tul ang zelin Aizawl khawpui zauh hna emaw, khawpui thar din kawng ah pawh Mizoram sawrkar nena thawhdunna neih an duh tih a sawi a. “In tan sum leh pai senna tur thil a awm vak lo ang, sawrkar kha thawhpui kan duh a ni ber a, Fund chu kan nei a ni,” tiin Chief Minister hi a hrilh a ni.