Drone Survey na tur vailiam

Sawrkar laipui pilot project ‘National Geo-spatial Knowledge-based Land Survey of Urban Habitations’ (NAKSHA) hnuaia Aizawl chhimlam a Municipal Ward pakua (Ward XI – XIX) a Veng 43 te huama Drone Survey-na tur chu nimin khan Land Revenue & Settlement Minister B. Lalchhanzova chuan a vailiam.

Mualpui Helipad a hemi puala hun hman ah Revenue Minister chuan NAKSHA chu sawrkar laipuiin Pilot Project anga kalpui mek a nih thu leh hei hi a hlawhtlin chuan Inhmun, lo/ram record vawn dan a tihchangtlun bakah nasa taka hmasawnna a thlen dawn tih a sawi a, Property Record leh khawpui Planning ah data tangkai tak an neih theih a beisei thu a sawi a. He Project hnuaia data hmang hian ram buai leh enho ngaite pawh dawhkan-ah chiang taka enho a theih tawh tur thu sawiin, heng data te hi Revenue Department chuan a hmang tangkai duh Department te hnenah an hman chhawn tir theih tur thu a sawi bawk.

NAKSHA programme kaltlang hian India ram puma khawpui 153 thlanchhuah bikah Land Record tha zawk siam tum a ni a. Mizo-ram-ah pawh February ni 18, 2025 khan India rampum rualin Land Revenue & Settlement Minister hian he programme khuhhawnna hi a nei a. Mizoram-a Pilot Project atan Aizawl Municipal Council hnuaia chhim lam Ward 11 atanga 19 (veng 43) thlan an ni a, bul tan nan Ground Control Points te siamin Helicopter in LiDAR leh Photogrammetry survey neih a ni tawh a ni.

Tunah hian Drone hmangin thlalak a ni leh anga; chumi a Map an rawn siamchhuah (generate) hmangin leilunga endikna, Ground truthing kalpui leh a ni dawn a. Ram neitu bakah Local Council leh khawtlang hruaitute tel ve a pawimawh dawn a. Hetah hian LR&S department bakah UD&PA leh AMC te nen thawhhona tha tak neih a ngai dawn a, data pawh intawm vek tur a ni ang.