LSA ten Lawngtlai-ah Pisa kai tur an dang tan

Lai Autonomous District Council (LADC) Sawrkar thiata inthlan buatsaih ngiatin nimin khan Lai Students' Association (LSA) huaihawtin LADC Pisa leh DC Pisa kai turte dan an ni.

Lawngtlai District-a Zirlai pawl lian ber, Lai Students' Association (LSA) chuan May 2 khan thuchhuah siamin Mizoram Larsap Gen (Rtd) Vijay Kumar Singh hnenah LADC thiata inthlanna buatsaih a nih theih nana hma la turin an ngen a, hemi hmalam pawh hian Governor hnenah ngenna an lo thlen tawh a, an thuchhuahah an ngenna chu ni 4 chhung a tih hlawhtlin a nih loh chuan Sawrkar Pisa te dan an tum thu tarlangin, nimin atang khan LADC Office leh DC Office a kaiturte an dang tan a ni.

Lai Students Association (LSA) General Secretary Matthew Lalhumliana Fanchun chuan an duh ber chu LADC-a inthlan that a ni tih sawiin, tunhnaia CEM inthlak zing lutuk chu mipuite zahlohna lian tak a ni tih a sawi a, an ngenna chu sawrkar in hriatpui se, inthlan that chu buatsaih se an duh thu a sawi bawk.

Lawngtlai Students' Association (LSA) chuan LADC-ah tun Sawrkar Term kallai ah Sawrkar inthlak a thlen nasat vangin eng Party mah rorelna chang tura rin ngam an neih loh vangin Sawrkar dinglai thiata, inthlanna buatsaih thuai chu an duh ber a nih thu an sawi a, an kal zel dan tur chu Committee in a ngaihtuah zel tur thu leh chanchin buatsaih lai thlengin Governor atangin eng thu mah an dawnloh thu Zirlai pawl hruaitu chuan a sawi bawk.

Hetihlai hian Lawngtlai MNF District Hqrs. leh BJP LADC Hqrs. chuan thuchhuah intawm siamin, tuna LSA chet lak danah politician te an inrawlh ngei an ring tih an sawi a, LADC-ah Sawrkarna ngialnghet din anih theihna atana Majority ngah zawk apiangte pawm an nih thin tbhu leh hei hi Democracy kalphung dik tak a nih thu an sawi a ni.