CM in AIWPA te a kawm

Mizoram tlawha lo zin mek All India Wine Producers Association hruaitute chu nimin khan Chief Minister Lalduhoma chuan kawmin Mizoram tana an rawtna te a ngaihthlak sak a, AIWPA President Jagdish Holkar chuan Mizoram, ram mawi tak hi Grapes leh thlai dang, Wine siam theihna chi te hmanga khualzinte hip thei khawpa ram mawiah a siam theiha an hriat thu sawiin, Wine Board tha tak awm se hmalak a awlsam zual ang tih a sawi a. Tuna Wine siam mek te hi an tha thawkhat tih pawh sawiin, tihchangtlun deuh erawh a tul nia an hriat thu leh Grapes, Balhla, Lakhuih-thei, Dragon Fruits, Sapthei leh Kiwi te chingin Wine a siam theih anga, loneituten an hlawkpui bakah a siam lama tui te tan eizawnna tam tak a siam theih dawn thu leh a siam lama tui te inzirna tur Incubation Centre pawh an din theih tur thu a sawi a ni. He hunah hian Chief Minister chuan an rawtna te chu ziaka thehlut tura lo chahin, “MLP Amendment Act kan nei a, Rules lam kan buaipui mek a. In rawtnate chu kan dan te nen a inhnerem thei dawn em tih te kan en a ngai dawn a ni,” a ti bawk.