Centre of Excellence for Flowers dinna tur endik

Horticulture Department-in Thiak a Centre of Excellence for Flowers dinna tura rawtna a siam endik tura Holland atanga lo kal, Ton Bakker, PUM Expert, Indo-Dutch Centre of Excellence for Flowers chuan Inrinni khan Horticulture Department hotute leh Mizorama Floriculture pawl lian pali te a kawm.

Ton Bakker hian April ni 29 khan Aizawl lo thlengin, Horticulture Department-in Centre of Excellence for Flowers atana hmun a lo rawt mek a endik bakah Mizorama pangpar chingtu pawl hrang hrangte hmalakna a hmunah a enpui a, Florists Fair neih mekte pawh fangkualin Aizawl leh a chhehvela pangpar chinna hmun a fangkual bawk a ni.

He inkawmna hi Horticulture Department Director CH. Lalmuanpuia kaihhruaina hnuaia neih niin, Centre of Excellence for Flowers neihna tura Horticulture Department in hma a lak mek dan te a sawifiah a. Expert lo kal Ton Bakker-a chuan Horticulture Department leh pawl hrang hrang hmalakna fakin, hmasawn theihna lai tur te sawiho a ni a, Mizoram in hmabak eng tak a neih thu a sawi bawk. He hunah hian Horticulture Department-a Deputy Director Emeylene Lalmawipuii chuan Mizoram Floriculture dinhmun sawifiahna hun hmangin presentation a pe bawk.