Ui a seh nia rin pakhat thi, hri danna la an tam zel

Kumin chhungin Mizoram-ah Ui a seh nia rin vanga boral mi pakhat an awm tawh a, Mizoram thenawm, Manipur-a Ui a hri a len avangin tunhnai ah Ui a hri laka invenna vaccine la an thahnem hle.

Zalen-in AH&Vety Department thawktute hnen atanga thu a dawn danin April 4, 2025 khan Ui a seh vanga boral nia rin mi pakhat chu Durtlang damdawi In-ah a thi a. Vanduaina tawk hi hnamdang (Som Lal Hemron?) niin Aizawl atanga hla vak lo khaw pakhata mi a ni a. Amah hi Assam-a a zinna ah Ui in a seh a, Durtlang damdawi In-ah hian enkawlin a thi zui a. Hemi bak hi chu Department-in ui a seh report an la dawng lo a ni.

Hetihlai hian Manipur-a Churachandpur District-ah Ui a hri a len avang leh mi thenkhatten an thihpui avangin tunhnaiah hri laka invenna vaccine la an tam hle a. April, 2025 chhung ringawt pawh khan vaccine la hi 10,634 an awm a ni. AH & Vety Department-a thawktute chuan, “Ni dangah chuan vaccine la hi thla khatah 2,000 vel chauhte an ni a; mahse, thenawm State-a Ui a hri a len avang hian April thla kha chuan vaccine la hi an tam hle a. Tuna kan chhinchhiah bak pawh hi hmun kilkhawr deuha pek; mahse, chhinchhiah loh engemaw zat a awmin kan ring a ni,” an ti.

Vaccine chu Vety Doctor awmna Dispensary-ah a mamawh tan a lak theih nia sawiin, vaccine lak man hi Rs. 100 atanga Rs. 150 inkar vel niin an sawi bawk.