Sipai ram chhuahsan tur chungchang sawiho a ni

Aizawl khawpui chhunga Assam Rifles chhuahsan tak ram luahzui dan tur chungchang sawihoin nimin khan Chief Minister Lalduhoma hova thutkhawm neih a ni a, sawiho zingah hian Assam Rifles chhuahsan ram a Mizoram Legislative Assembly Complex din tura ruahmanna a tel.

Nimin a Chief Minister Conference Hall-a Assam Rifles Ram Advisory Committee thutkhawm ah hian GAD changtu Commissioner Vanlaldina Fanai chuan AR ram chhuahsan taka hmalak chhoh dan a sawifiah a. Depreciated cost of buildings ah hian cheng vbc. 5 vel pek a ngai dawn nia a lan thu a tarlang a. Aizawl Bawrhsap Er. Lalhriatpuia pawhin tun hnaia Zokhawsang leh Lammual chhehvel Joint Verification a neih report a pe bawk.

Advisory Committee hi Section 6 of the Mizoram (Restriction on use of Transferred Land) Act, 2002 hnuai din a ni a. Chief Minister chu Chairman niin Home Minister chu Vice Chairman a ni a. Official Member  mi 16 bakah invitees, pawl pawimawh tak tak 14 an tel a. Advisory Committee hian AR ram chhunga ram nei mimal, pawl leh Kohhran te chu an ram pass te sawrkara hlan let vek tura ngen nise a ti a. Ram neitu thenkhat Court-a sawrkar khing mek te pawh an thubuaite hnukkir tura ngen an rel bawk. Sipai chhuahsan ramte hi mimal, pawl, party, NGO leh Kohhran kutah lut lo se tiin lungrual takin thu an titlu a ni.

He hunah hian rawtna hrang hrang 16 chuang sawiho a ni a, heng zingah hian Assam Rifles chhuahsan ram a Assembly Complex din te leh Home Department atanga rawtna lut, Assam Rifles Memorial din bakah INTACH, Mizoram Chapter atanga rawtna lut Assam Rifles Cantonment building chu vawn that tura ruahmanna te, UD&PA Department atanga rawtna Ropeway Project siamna tura ruahmanna te leh P&E Department atanga rawtna Sub-Station dinna tur te chu a tel a. Heng bakah hian Assam Rifles in Babutlang-a ram an chhuahsan Zarkawt Veng Joint Action Committee kuta hlan te leh Mizoram Florist’s Association atanga rawtna Flower Market emaw, Show House din te leh Aizawl Hmathlir Pawl (AHP) atanga rawtna Assam Rifles chhuahsan ram a Mizoram Police duty indah te leh Assembly House din bakah Laldenga Cultural & Community Centre sak tura ruahman aiah Aizawl Green Park siam zawk ni se tia rawtna te chu sawiho tur zingah dah a ni.

Agenda hrang hrang awmin Mizoram Gorkha Mandir Sanchalan Samiti Bazar Area, Aizawl chuan Zodin hmuna Assam Rifles Hari Mandir awm chhunzawm ni se tiin rawtna an thlen a, Biak In hmun Mizoram Synod hnena pek te leh Parking Lot siam tura hmalak bakah Bethlem Branch YMA atanga YMA Plantation siamna tura rawtna te pawh a tel a ni.