ASF vanga Vawk thi leh suat 1,16,464 awm tawhin zangnadawmna dil mek zel a ni

African Swine Fever (ASF) vangin Mizoram-ah kum 2021 atangin Vawk thi leh suat (culled) 1,16,464 zet a awm tawh a, Mizoram sawrkar chuan African Swine Fever (ASF) vanga Vawk suat neitute zangnadawmna tur cheng nuai 2,494.17 chu sawrkar laipui-ah a dilpui mek a ni.

Mizoram-ah hian kum 2021 khan ASF hri hi a rawn lut tan nia hriat a ni a, hemi kum atang hian kumtin Vawk thi leh suat hi awm belh zelin kumin ah pawh Vawk 3883 zet thi leh tawhin Vawk 1168 suat a ni tawh bawk a, heng te nen hian March 2021 atangin Mizoram-ah ASF vangin Vawk 66,043 a thi tawh a, Vawk suat 50,421 awm tawh bawkin, a vaiin Vawk thi leh suat hi 1,16,464 zet a awm tawh a ni.

AH&Vety Department hotute chuan, kum 2021-a Mizoram-a ASF a len atangin sawrkar laipui inkaihhruaina angin kumtin Vawk suat neitute tan bik Annual Action Plan kaltlangin National Steering Committee (NSC) for the National Animal Disease Control Programme (NADCP)-ah zangnadawmna an dil thin thu leh kumin 2025-26 atan Rs 24,94,17,000 an dil thu an sawi a ni. AH&Vety hotute chuan, zangnadawmna chu NSC-in a pawm (approve) chuan sawrkar laipui leh Mizoram sawrkarin a inzat (50:50)-a an intum sem thin thu an sawi a, “Kum 2023-24 khan cheng vbc. 5.87 min approve a, mahse, cheng vbc. 1.46 (25%) chiah min pe. Kum 2024-25 ah pawh vbc. 1 vel atangin 25% (nuai 26) chiah min pe leh a, kan dil ang min pek kim loh nasat avangin zangnadawmna la pek loh an la tam. Sawrkar laipuiin zangnadawmna tur min rawn pek hian Mizoram State Matching Share (50%) chu kan dawng zel thin,” an ti a. Kum 2025-26 Annual Action Plan an thehluhah kum 2023-24 leh 2024-25 chhunga saswrkar laipuiin zangnadawmna a rawn pek kim lohte an dil tel thu leh an rawn pek kim theih chuan zangnadawmna an pek kim theih tur thu an sawi bawk.

Mizoram-ah ASF vanga Vawk thite finfiah theihna Laboratory awm tawh mah se sawrkar laipuiin a la pawmpui loh thu AH&Vety hotute chuan an sawi a, “Vawk thi kan endik turte Guwahati-ah Sumo-a kan thawn zel a ngai a, hei hian hun a duh rei thin. Tunah AH&Vety Department hian Guwahati-a an Bio Safety Level (BSL)-2 Laboratory ang kan nei ve a, mahse, sawrkar laipui recognise a la nih loh avangin recognise tir turin kan buaipui mek,” an ti bawk.