ZPM Thalai ten ruihhlo dona a hmalak lawmawm tiin ZPM beihna Dan hmanga umzui an tum

ZPM Thalaite chuan Ruihhlo tirem tura Home Department, Excise & Narcotics Department leh Central YMA-te'n thawhhona tha tak neia huai tak leh chak taka an hmalakna chu fakawm an tih thu sawiin, dawt thu phuahchawp hmanga ZPM Minister leh Party hruaitute tih hmingchhiat tumna tenawm tak chu Dan hmanga umzui an tum thu an sawi.

Nimin-a Aizawl Press Club-a thuthar thehdarhtute an kawmna ah ZPM Thalai Hqrs. hruaitute chuan  ZPM kaihhruai sawrkar-ah dan lova Kuhva tawlhruk titawp turin beihpui thlak a nih mek thu leh ruihhlo tirem turin chak taka hmalak a ni bawk tih sawiin, Excise & Narcotics Department hnuaiah District thar pathum-ah END Station siamin Department pawh nasa taka thuam a ni tih an sawi a. Kum 2024 chhung khan Heroin No. 4 hi kg 46.68 zet manin, kum 2025-ah April 13 thlengin kg 16 an man tawh tih an sawi a, a hlawm lian-a man te pawh an neih nual thu sawiin, “Heng te hi dan angin Department-in thuchhuah siamin mipuiah an puangzar a, Court lama rorel zui turin thubuai siamsak an ni a, hetiang hian chak takin hma an la chhunzawm zel bawk,” an ti.

Police te hmalakna pawh tarlangin, “Kum 2024 chhung khan Heroin No. 4 kg 80.814 zet an man a, a hlawm liana man pawh vawi engemaw zat an nei tawh. Kum 2025 chhungin Heroin kg 14.572 an man tawh bawk a, hetiang zat ruihhlo man tur hian an thawkrimin an bei nasa hle tih a chiang a, an chhuanawm kan ti takzet a ni,” tiin Heroin hlawm lian-a man an neih fo thu an sawi a, “Mizoram Police hmalakna in March 15, 2025-a Heroin kg 4.722 (hawng 440) kaihhnawihah Henry Lalbiakzinga Chhundeng, Dinthar leh a thawhpui Laltluangzela man an ni hi lawmawm kan ti a, ZPM Thalai Hqrs. chuan kan Police-te huai tak leh chak taka an chetna hi kan chhuang hle a ni. Mizo thalaite thihna tur ruihhlo a sumdawng duhtute hi ram leh hnam hmelma an niin kan dem takzet,” an ti.

ZPM Thalai hruaitute chuan tunhnaia Heroine kg 4.722 chungchang ah fak phu tak Police te pawh fak hman lo leka Henry Lalbiakzinga Chhungdeng nena ZPM-in inzawmna nei ang leh, politics chhe mi, Mizoram-ah awm tawh lo se an tih hmanga dawt thu phuahchawp hmanga ZPM Minister leh Party hruaitute tihhmingchhiat tumna tenawm tak chu tha lo an tih thu an sawi a. “Ram hlui zia politics changchawitu te'n thlalak hlui hrang hrang zawngkhawm a, zeldin thubawla dawt phuahchawp hmanga mipui rilru hruai kawi thei tura Social Media-a thu an vawrh darh hi ZPM Thalai chuan kan ngai thutak hle a; ruihhlo tawlhtu hnen atanga ZPM-in pawisa an dawng anga inpuhna phei hi chu ngawih bopui chi-ah kan ngai lo a ni. He dawt thu hmanga kan Minister-te leh ZPM Party beihna hi intihhmingchhiat tumna ni ngeia kan ngaih vangin Vawiin-ah hian mipui hmaah thu dik hailanna a nih nan ZPM min beitute lakah hian FIR kan thehlut dawn a ni,” an ti bawk.