MNF LC leh VC te chu danglam bik turin chah

MNF Senior Vice President Dr. R. Lalthangliana chuan MNF Local Council leh Village Council te chu danglam bik, tha bik, entawntlak ni turin a chah.

Saitual District atanga MNF VC tling tharte leh term sarih (7) VC tling tawhte chawimawina hun chu nimin khan Keifang Venghlun-a Zawlbuk-ah neih niin he hunah hian Dr. R. Lalthangliana chuan MNF Party-ah Harh thar lehna a thleng mek nia sawiin, “LC leh VC ruling-in zaa sawmsarih vel an la thin ang kha a thleng lo a. ZPM hi an sawrkar chak ber lai pawhin MNF-in kan la tam hle a, a lawmawm hle a ni. Tun LC leh VC inthlana Ruling hniam taka an awm hi a la thleng ngai lo a ni,” tiin MNF LC leh VC te chu danglam bik, tha bik, entawntlak ni turin a chah bawk.

MNF Senior Vice President chuan MNF leh Congress an lo sawrkar tawh tih sawiin, “Mipuiin hetiang reng renga sawrkar an nin hma hi a la awm ngai lo. Thil tam tak an tiam a, Driver Pension Scheme thlengin an tiam a. Engkim mai an tiam a, an sawrkar hma atangin mumang ramin an kal a. Thlai thar kan lei ang, motor pakhat chauh kan kawl ang, an tia, an thusawiin na takin a vaw let mek a ni. An kal dan en hian ZPM hian an daih rei ka ring lo,” a ti a. MNF chu sawrkar leh turin a inbuatsaih leh mek tih pawh sawiin, “Policy & Programme Committee din a ni a, a ki dang deuhin ram mipui zawh tur leh thalaite dinchan theihna tur hawi zawng, thingtlang loneitute dinchhuahna tur kan duang dawn. A ki danglamin Policy tihhlawhtlin ngei tur kan duang dawn a ni,” a ti bawk.