Aizawl AR hmuna LSC nei surrender lo an la tam

Assam Rifles-ten Aizawl khawpui lailia an hmun an chhuahsan mek a, hetihlai hian he hmuna LSC nei zingah an LSC te sawrkara surrender an la awm belh rih lo.

Aizawl-a Assam Rifles ram luah zawng zawng chhunga LSC neite hi Commandant Bungalow area-ah mi pali, McDonald Hill area-ah mi pathum leh Main Barrack area-ah mi 54, an vaiin mi 61 an ni a, LSC neitu mi 61 zinga mi 13-te chuan an LSC chu sawrkar-ah an surrender tawh a, la surrender lo te hi sawrkarin thil awm dan a sawipui mek nia thudawn a ni a, Assam Rifles ram luah zinga LSC nei surrender tawhte hnenah hian sawrkarin lawmthu sawina ziakin a pe vek dawn nia thudawn a ni bawk.

Hetihlai hian March 24, 2025-a thukhawm NGO Co-Ordination Committee (CYMA, MUP, MHIP, MZP, MSU) chuan Assam Rifles-in Aizawl khawpui lailia an awmna an chhuahsanah tumah mahni hmunhma atana hma la lo turin an ngen a. Sipai ram luah chhunga mimal LSC nei engemaw zatin mipui hmakhua ngaia an LSC an hlan let chu ropui an tih thu sawiin, ram leh hnam tana an inpekna an ngaihlut rualin LSC nei dangte pawhin ram leh hnam tana hlan ve turin an ngen nghal bawk a ni.