Zirna In hawn tan a ni ta
Mizoram sawrkara School Education Department ruahman angin kum 2025-2026 Academic Session hi nimin, April ni 7, 2025 atang khan tan a ni a, sawrkar thuchhuak zawmin Mizoram hmun hrang hranga zirna In te chuan zirna In an hawng tan a, Primary School atanga Higher Secondary School zirlai leh zirtute chuan School kaiin, inhlantharna hun an hman bakah sikul thenkhat chuan an School hmunhma leh a chhehvel tihfai hnatlang an nei bawk a, zirtirtuten zirna hawn tan ni hian an zirlaite lo hmuakin an lo dawngsawng bawk a, zirna In tanni ah hian an kalphung turte inhrilhin hun hlimawm tak an hmang hlawm a ni.
School Education Department in Zirna Calendar a tihchhuah ang chuan, kumin Session thar ah hian Primary zirlaite chuan ni 204 chhung School an kai ang a, Middle Section ten ni 220, High School leh Higher Secondary School ten ni 206 an kai dawn a ni.
Samagra Shiksha-in a thlawna zirlaibu a sem thin pawh kumin hian tluang takin sem mek a ni a, District tinten anmahni huamchhung theuhah zirlaibu sem hi an buaipui a, tunkar chho ah hian zaa 80 zet chu semchhuah hman beisei a ni a. Samagra thuneitute chuan kumin zirlaibu chu nikum School enrollment atanga chhutin Printing and Stationary Department atangin an dawng kim tawh a, Zirlaibu zaa 85 chu District Office-ah an pe tawh a, District Office te chu School hawn hmain zirlaibu zaa 80 chu pechhuak vek turin an hriattir tawh bawk tih an sawi a. Hetihlai hian zirlai zingah sawrkar School a inziaklut, lehkhabu dawn hnua Private School a insawn te an awm leh thin avangin Zirlaibu la pekchhuah hmabak zaa 15 chu kumin School Enrollment tihchian hunah an pechhuak chauh dawn tih sawiin, tunkar chhunga tihchian hman an tum thu an sawi a ni.
Comments
Post a Comment