Cheng nuai 224 senga Serchhip BDO Office sak thar RD Minister in a hawng

Cheng nuai 224 senga sak Serchhip P&E Veng-a Block Development Officer (BDO) Office chu nimin khan Rural Development Minister Prof. Lalnilawma chuan a hawng a, Office building thar leh mawi ah duhtawk mai lova Zonun Zemawi-Hawihhawmna nen tha taka hna thawk turin he Office-a thawktute chu a sawm a ni.

Serchhip P&E Veng Rural Development Department ram-a Sderchhip BDO Office thar tur, Panchayat Bhavan-cum-Block Development Officer (BDO) Office hi RD Minister Prof. Lalnilawma chuan Ribbon chepchat-a hawngin Building thar Conference Hall-ah a lawmna neih zui nghal a ni a. He hunah hian RD Minister chuan Serchhip chu Chief Minister Bial a nih thu leh kawng hrang hrangah an vanneih thu sawiin, District enkawlna kawngah leh RD Department-ah pawh thawktu tha tak tak an awm thu a sawi a. Serchhip RD Block Office hawn theiha peihfel a lo ni ta chu lawmawm a tih thu sawiin, “Sawrkar hnathawkten kan hun tam ber kan hmanna, kan Office chu a building a chhia emaw, a tha emaw a nuam tur a ni a, kan chhuang bawk tur a ni,” tiin Office dawrtute tan pawha chhuan tlak a nih a pawimawh thu a sawi a. Office building thar leh mawi ah duhtawk mai lovin a thawktute pawhin Zonun Zemawi-Hawihhawmna nen tha taka hna thawk turin a sawm a. Office hna chuan hmasawnna tha leh duhawm, thingtlang lam leh ram mipuite tan thlen ngei se a duh thu sawiin, thawktuten phurna thar nen an phak ang tawk theuhah theitawp chhuah thar theuh turin a sawm bawk a ni.

RD Minister chuan an Department hnuaia hmalakna hrang hrangte tarlang bawkin, heng zingah hian tunlaia tuihna tlem zel tih ziaawmna turin Sarovar 2.0 programme hnuaiah chak taka hmalak mek a nih thute, mi rethei In sak tanpuina PMAY Scheme kaltlanga hmalak mek a nih thu leh Rural E-Library changtlung nei turin hmalak mek a nih thute a sawi a. Serchhip chu sawrkar hnathawk tha tak tak leh sawrkar hmunhma hrang hrang tha tak tak an neih avangin an vanneih thu sawi bawk a ni.

Serchhip BDO Office Building thar hawnna hun hi Stephen Laltlansanga Auhmun, ARDO DRDO chuan kaihruaiin DRDO Project Director leh BDO mawhphurhna chelh mektu Dr. Malsawmtluanga Fanchun chuan inlawmna thu a sawi a. Technical Assistant C. Remsangpuii chuan Technical Report pein Panchayat Bhavan cum Block Development Office hi MGNREGA Material Component atangin Rs. 2,24,55,000/- senga sak a ni a. April ni 7, 2024 khan sak tan niin April ni 7, 2025 hian sak zawhfel niin hawn a nih thu a sawi.

He building hi Mizoram Technocraft Company Pvt. Ltd. sak niin thla 12 chhunga sak zawh a ni a, a building hi Zopa chhiara chhawngli niin a chhawng hnuai ber (basement) hi Office Canteen leh Chowkidar Quarters tur a ni a, Ground Floor-ah BDO Room, Establishment Staff leh MzSRLM Staff te awmin 1st Floor-ah MGNREGA Staff te an awm anga, a chhawng chung ber chu Conference Hall atan hman a ni ang.

He hunah hian Bawrhsap Paul L. Khuma pawhin RD Department-ah hian hun rei tak a lo awm tawh thu leh hetianga Building thar tha tak an nei chu a lawm thu a sawi a.  RD Department-a Addl. Secretary V. Lalengmawia pawhin Office thar chu a bik takin thingtlang mi ten ngaihngam taka an rawn dawrna hmun tur a ni tih sawiin, RD Department-a Director K. Lalrohlua pawhin thu a sawi a ni.

He hunah hian MC Zirsangliana, Asst. Programme Officer (MGNREGA) chuan Report pein Serchhip BDO Offfice-ah hian Establishment Staff 9. MGNREGA-ah thawktu mi 39 leh MzSRLM-ah thawktu mi 11 an awm mek a ni.