Serchhip Auditorium chu mipuite tan a him lo thei nia hriain thiah a nih theihna tura hmalak rel a ni

Serchhip mipui ten punkhawmna atana Hall kan neih len ber, Serchhip Auditorium chu mipuite tana a him lo thei nia hriat a nih avangin thiat tura hmalak nise tih a ni.
Serchhip Auditorium chungchang ah hian Serchhip Bawrhsap chuan nimin tlai khan Serchhip DC Meeting Hall-ah thutkhawm ko in Serchhip Joint VC, Serchhip Field Veng VC leh Serchhip Town Beautification Committee te bakah YMA, MHIP leh MUP Sub-Hqrs. President te koh an ni a. He hunah hian Serchhip Auditorium dinhmun hrang hrang leh tunhnaia zirchianna neih a nih tawh dan te sawiho a ni a, Auditorium dinhmun hi ngun tak zirchian niin chhiatna rapthlak zawk thlen theiin a awm zual zel nia hriain thiah a nih theihna tura hmalak hi an rel ta nia thudawn a ni a. Chutihrual erawh chuan Serchhip-ah mipui punkhawmna tur Hall lian tha tawk sak vat a nih theih nan hmalak an rel bakah a hmunhma tur pawh mitmei lawk nise an ti bawk a ni.

Serchhip-a Auditorium dinhmun hi nikum September 19 khan PWD-a Quality Control Division chuan a hmunah kalin an rawn enfiah tawh a, hemi tum hian Auditorium Ban leh Beam-a RCC chhun te chu a la tha thawkhat viau nia a lan thu sawiin, amaherawh a bulthut lamah lei che awm thin a nih avangin hemi che hian a building hi a ti che nia rin theih a nih thu an sawi a. Hemi hnu hian a awmna khawtlang lam atanga thiah rawt niin Auditorium hnuai lama awm te pawhin an hming ziakin thiah a nih theihna tur hian lehkha an siam nia thudawn a ni bawk.

Serchhip Field Veng-a Field No-I awmna hmuna Auditorium hi Ministry of Urban Development sum cheng nuai 2126.01 hmanga sak a ni a, UD&PA Department chu Nodal Department niin NBCC Ltd. chu Implementing Agency a ni a, June 23, 2017 khan khatih laia Chief Minister Lal Thanhawla chuan a hawng a ni. Serchhip Auditorium-ah hian mihring 1000 thut theihna tur thutthleng dah niin Ground Floor-ah hian VIP Lounge, Office Room, Refreshment Room, Exhibition Hall, Green Room leh inthiarna awmin 1st Floor-ah Meeting Hall pahnih, Rest Room leh inthiarna a awm a, 2nd Floor-ah Auditorium ber hi dah niin hetah hian Light leh Sound System tha tak dah nghal niin kangmei chhuak palh ah pawh kangthelhna hmanrua dah nghal a ni a, 3rd Floor-ah Light leh Sound Control-na awmin Projector tha tak dah a ni a, DG Set 250 kVA leh Transformer 125 kVA te dah a ni bawk a. Heng bungraw dah zinga a tam zawk chu hman hleih theih lohin a chhe tawh a, a bik takin Light leh Sound te a chhe nasa in a bang leh kawt vel hi nasa takin a khi a, hei hi thiah an rawt chhan ber pawh niin a lang a ni.