YMA in Fimkhur Thla hmang theuh turin an ngen

YMA Rorelna sang Central Co-ordination Committee (CCC)-in Furpuiin a ken tel chhiatna hrang hrang laka lo inven lawkna tur, ‘Fimkhurna Thla’ chu Sub-Hqrs., Group leh Branch te chu mahni huamchhung theuhah hmang turin an chah.

CCC vawi 102-na hi niminpiah khan Aizawl Tuikhuahtlang-a Central YMA Hall-ah neih a ni a, he hunah hian nikum-a YMA Rorel Inkhawm-pui a thurel hrang hrang bawhzui dan tur sawiho a ni a, Furpuiin a ken tel chhiatna hrang hrang laka lo inven lawkna turin ‘Fimkhurna Hapta/Thla’ ram puma hman tih chu kumin April thlaah hman mek a nih angin, Sub-Hqrs., Group leh Branch ten mahni huamchhung theuh uluk leh fimkhur taka hmang tur te in an rel a a ni.

Hei bakah hian Mizoram chhunga kawngpui te vil tura YMA-in Monitoring Team a din ten nasa zawka hmalakna kalpui zel tur te, Ruihhlo Do leh Mizo tawng humhalh kawngah chak zawkin YMA-in hmala tur te, Company/Corporate ten Mizoram chhungah CSR tam zawk an hman theih nan Central YMA-in Committee a din te hmalakna te inhrilhfiah a, a tul anga hmalak chhunzawm zel te an rel a ni.

CCC Meeting chuan sawrkar khawih pawh relin, Mizorama raltlante awmna hmun tur, enkawl dan tur leh kaihhruaina mumal tak Sawrkar-in siamin, khauh taka a kenkawh zui theihna tura  ruahmanna lo siamtu tur Central YMA in Committee a din te chu nasa zawka hmala tur te, Mizoram Lokayukta-in thubuai chhuitu tur Investigation Agency hranpa a neih theih nana hmala tu tur Central YMA in Committee a din te chu a tul anga hmala chhunzawm zel tur te, tunlaia School thenkhatin Pawl 4 thlenga Mizo Subject an la zir mumal lo chu Sawrkar hmalak tir turte leh Mizoram Education Rules hrang hrang te (Elementary - Higher Secondary School) a tul anga siam a a, ennawn tura hmalak zel an rel a ni.