Wine leh Beer permit pek thar awm rih lo

Mizoram Legislative Assembly Budget Session a pass tak, ‘The Mizoram Liquor (Prohibition) Amendment Bill, 2025’-ah Rules duan ngai neuh neuh a la awm avangin he Dan thar hnuaiah hian Wine leh Beer siam phalna ‘permit’ pek thar an la awm lo.

Excise & Narcotics Department thawktute hnen atanga thudawn danin Hnahlan Grape Growers Cooperative Society leh Champhai Grape Growers Society hnenah chauh Wine siam phalna hi pekchhuah a ni a, heng Society pahnihte hi chuan a hma daih atang tawhin Wine siamna permit hi neiin tam tak an lo siam chhuak tawh a. License nei tur hian kum khatah Rs. 15,000 an chawi a ngaih bakah Security Deposit Rs. 10,000 an dah a ngai a. Hei mai bakah labelling an tihna man atan Rs. 20,000 an chawi a ngai bawk a ni. 

Hnahlan leh ChamphaiWwinery-ten Wine siam phalna hi nei tawh mah se thlai dangah siam phal a nih dawn tawh avangin Rules hi tlema siam danglam a ngai dawn a; mahse, hei hi chu thil har a ni dawn lo niin an sawi a. Sawrkar ruahman dan chuan Wine hi Grape-ah chauh ni lo Mizoram thlai tharchhuah dang Balhla, Lakhuihthei, Kawlthei, Sunhlu leh Kiwi ah te Wine hi siam phal a ni dawn a. Excise & Narcotics Department chuan Horticulture Department hnenah eng theite nge Mizoram in a neih tih te, khawi hmunah te nge chin uar an nih, eng hunah nge seng a nih tih leh thil pawimawhte an zawt mek.

Hnahlan leh Champhai Winery-te hian an thil siamchhuahte hi alcohol awm tur zat 8%-12% inkar a nih a ngai a. Hnahlan Winery atang hian ‘Isabella’ siam niin Champhai Winery atangin ‘Champwine’ siam a ni thung.

Hetihlai hian Beer chungchangah chuan thil thar a nih dawn avangin siam phalna Rules hi duan deuh a ngai dawn a. Mizoram chhunga Agriculture atanga tharchhuahte hmanga Beer hi siam phal a nih dawn avangin Beer chungchanga Rules siam chu a buaithlak mai thei niin Excise & Narcotics Department thawktute chuan an sawi a, Rules pawh an la duang lo niin an sawi bawk.