Japan Embassy kaltlanga Mizo thalaite tana hamthatna awm thei hrang hrang sawiho

Labour, Employment, Skill Development & Entrepreneurship Department changtu Minister Lalnghinglova Hmar leh leh Japan Embassy-a First Secretary te chu niminpiah khan inkawmin Japan Embassy kaltlanga Mizo thalaite tana hamthatna awm thei hrang hrang an sawiho.

New Delhi Mizoram House-a inkawmna ah hian LESDE Minister Lalnghinglova Hmar chuan Mizoram chu State lian lo, Workforce pawh tam lo ni mah se thalaite’n thil an thiam chak a, a bikin kum upa tamna ram Japan in a mamawh heng - Nursing, Caregiving leh Hospitality Sector-ah te Mizo thalai te theihna a sang tih a sawi a. “Japan in demand a nei a, keini’n supply kan nei thung. Tunhnaiah LESDE Department hmalaknain Mizo thalai engemawzat chuan Japan ramah hna an thawk tawh a, hei aia lian a kalpui kan duh,” a ti a. Mizo thalaite’n Japanese culture an ngaihven tih pawh sawiin, “Mizoram chhunga huihawt Cosplay-ah pawh kan thalaite’n Japanese Culture pholan an uar hle. Hei hi intihhlimnaa tawp mai lovin eizawnna tling, Mizoram leh Japan thlunzawmna hmanrua pakhat ni thei se kan duh.” a ti a. Hemi chungchangah Japanese Organization te nen thawhho a duh thu a sawi bakah Olympic sports discipline thlanchhuahah JICA atangin Mizoram in Sports Coach a dil mek thu leh a tul anga bawhzuisak turin a sawm nghal a ni.

He inkawmna ah hian Japan Embassy-a First Secretary pahnih - Hagiwara Ryusuke and Tsubakimoto Mayumi-i te telin Mizoram leh Mizo thalaite chanchin chu ngaihnawm leh phurawm an tih thu an sawi a. India State dang te nen khaikhinin Mizoram atanga Japan rama hnathawk an la tam lo hle tih sawiin, Mizo thalaite tana sawrkar hmathlir hrang hrang tihlawhtling turin thawhpui an inhuam reng tih leh, a bikin Caregiving leh Nursing Sector-ah Mizo thalaite theihna an hre tawh tih Minister chu an hrilh a. Infiamna leh Cultural Exchange hmanga Mizoram leh Japan thlunzawmna nghet zawk zawn tha an tih thu sawiin, India ram chhung leh pawn a Japanese Organization te nena thawhho kawngah pawh theihtawp an chhuahpui tur thu an sawi bawk a. He inkawmna a tel te hian a rang lama mumal zawka sawi chhunzawm an rawt bawk a ni.