Ui khuahkhirhna thupek thar tihchhuah a ni

Serchhip District Magistrate chuan Serchhip District chhunga Ui khuahkhirhna thupek thar a tichhuak.
Niminpiah-a hemi chungchanga thupek a tihchhuah ah Serchhip District Magistrate Paul L. Khuma chuan India ramchhung leh Mizoram chhungah faina leh hriselna lama hma kan sawn theihna turin sawrkar-in chak takin hmalakna a kalpui mek thu leh Serchhip District chhungah pawh mipuiten faina leh hriselna lama hma kan sawn zel theihnan theihtawpa hmalakna kalpui a ni tih a tarlan bakah, kan State thenawm Manipur ah tunlai hian Ui a hri (Rabies) a leng mek a ni tih hriat a nih bawk thu a tarlang a. Hei hi mihring hriselna leh nunna atana thil hlauhawm tak a nih thu leh hei hian khawtlang hriselna, faina, mihring nunna a nghawng theih avangin he thupek hi Section 163 of Bharatiya Nagarik Suraksha Sanhita, 2023 tlawhchhanin chhuah a nih thu a tarlang a ni.

He khapna thupek ah hian midangte tana harsatna siam zawng leh midangte tana hnawksak in Ui vulh loh tur a nih thu te; Ui vulhtu ten khawlai ah an Ui te an chhuah zalen tur a nih loh thu leh khawlaia an chhuahpui dawnin hrui/chain rinawm tha taka hlingin an kai ngei tur a nih thu te; Ui vulhtu ten an Ui vulh te Ui a hri danna (anti-Rabies) vaccine an pe vek tur a nih thu te; Khawlaia Ui tla leh a nghawnga hrui/chain-a thlunna awm lo te chu neitu awm lo anga ngaih a nih tur thu te leh kan State thenawm Manipur atangin Ui leh a sa lakluh khap tlat a nih thu te a tarlang a ni.

Hei bakah hian District Magistrate thu-chhuah chuan Ui khuahkirh lohin mihring a seh/tihnat chuan Section 291 of Bharatiya Nyaya Sanhita, 2023 hmangin thlaruk (6) chhung Lung In tan emaw, Rs. 5,000/- thlenga chawitir theih a ni tih pawh a tarlang a. He thupek hian thu leh awm hma chu Order chhuah a nih April ni 8 2025 atanga thla hnih (2) chhung a huam tur thu leh thupek zawm lo chu Section 223 of Bharatiya Nyaya Sanhita, 2023 hmanga hrem theih an ni ang tih te a tarlang a ni.