Sawrkar zirna In-a thawktute tan la turin sawm

Serchhip District Bawrhsap Paul L. Khuma chuan Sawrkar enkawl zirna In-a thawktute chu tun aia nasa zawka tan la turin a sawm.
PM SHRI School Jawahar Navodaya Vidyalaya, Thenzawl Serchhip District-a Admission tih thar tur chungchangah nimin khan Orientation chu Serchhip DC Meeting Hall-ah neih a ni a, he hunah hian Bawrhsap Paul L. Khuma chuan School Principal leh thawktute inpekna leh hmalakna chu fakawm a tih sawiin, Sawrkar enkawl zirna In-ah engkim a thlawn veka kalpui a nih reng laia mimal enkawl zirna In ten naupang an nei tam zawk thin laite chu ngaihtuah tham tak a nih thu a sawi a, thawktute pawh tun aia nasa zawka tan la turin a sawm a. Nu leh pa te hian zirna In rintlak, an fate ngaihngam taka an dah theihna tur an duh thin a ni tih hre reng chunga tan lak a tul thu a sawi bawk a. JNV School chu kan District hmel lan theihna tur pakhat a nih avangin kan tan tlan a tul thu a sawi bawk.

He hunah hian JNV School Principal Anish P chuan an School-a pawl VI Admission an hawn mek chu diltu mi 551 an awm thu a sawi a. April 12, 2025 chawhma dar 10:30-ah Exam Centre hrang hrang Serchhip, Thenzawl leh Khawlailung-ah te in report tur a nih thu a sawi a. JNV-a lut tur hian engkim a thlawn vek a nih thu sawiin, naupang talent nei tha bikte chu phai lam leh hmun dangah hruaichhuahna remchangte pawh an siam sak thin thu a sawi bawk.