Khawpui chhung kawng siam hna thawk mek

Serchhip khawpui chhunga National Highway kawngpui chhia thawmthat hna chu tunlai hian thawh mek a ni.
Serchhip khawpui chhung Kikawn atanga Sailiamkawn inkar siamthat hna hi NHIDCL hnuaiah thawh mek a ni a, nimin khan Serchhip Bilzel Veng-a kawng chhe nasa zual lai chu blacktop that niin hemi rual hian Ser-chhip Tuikhuah Veng-a lei tlahniam te, Dinthar Veng Gate kawi-a lei tlahniam leh kawng chhia hmun hrang hrang a mi te pawh siamthat hna hi thawh a ni bawk.

Tarlan tawh angin Serchhip Sub-Hqrs. YMA chuan nikum November thla khan Chief Minister leh Bialtu MLA Lalduhoma hnenah he kawng siamtha tur hian ziakin an thlen a, Chief Minister in NHIDCL te chu hma la tura hriattirin kawng siam ngai hi YMA te nen enfiah a ni a. December thla a siam tura ruahman chu khua in a zir loh avang leh Krismas Bazar, mipui tam laia kawng dan te a tul dawn avangin tih theih a ni ta lo a. Hemi hnu hian kawng siamtu Company lam hian Khumtung atanga chhimlam pan-a an kawng siam thawmthat hna thawka an bungrua an hman leh tak avangin tunah hian kawng hi an siam thei ta chauh a ni.