Boundary Committee in inbiakna neih tur an thlirho

Mizoram State Boundary Committee chu nimin khan thukhawmin tun thla ni 25-a Mizoram leh Assam State sawrkar ten Secretary-Level Meeting Guwahati-a an neih tur chungchang an thlirho.

Mizoram State Boundary Committee Chairman leh Home Minister K. Sapdanga hova thutkhawmah hian Home Minister chuan ramri him tak, mipuite thlamuang taka an khawsak theihna tur nawrchhuah chu an thupui ber a nih thu a sawi a. Mizoram tana channa awm lo tura theihtawp chhuah a nih thu sawiin, Mizoram leh Assam ramri zirchiang tur Study Group Member pali (4) awmna pawh kumin January ni 25 khan din a nih thu a sawi a, he Study Group hian chhuanawm takin hma an lak thu leh anni zarah Document tanchhan tur pawh an nei tha tawk tawh hlea an inhriat thu a sawi a. Mizoram aiawha ramri chungchang inbiakna a palai kal turte pawh an inpuahchahna a tha thawkhata a hriat thu sawiin, Mizoram tan theihtawp chhuah turin a fuih a ni.

Directorate of Forensic Science Laboratory Conference Hall-a thutkhawm ah hian tun thla, April ni 25 (Zirtawpni)-a Guwahati, Assam-a Mizoram – Assam State Secretary-Level Meeting neih tur chungchang thlirhoin, Mizoram sawrkar atanga thu ken turte leh pawimawh dang chi hrang hrang an sawiho a ni. Mizoram – Assam State Secretary-Level Meeting-ah hian Mizoram sawrkar chuan Home Secretary Vanlalmawia hovin palai mi 7 a tir dawn a ni.

Mizoram State Boundary Committe thutkhawm hmasa ber hi July ni 30, 2021 khan neih a ni a, thutkhawm vawi 2-na hi September ni 7, 2021 khan neih niin a vawi 3-na chu November ni 17, 2021 khan neih a ni a, a vawi 4-na chu September ni 9, 2022-ah neih niin, a vawi 5-na hi January ni 20, 2023 khan neih a ni a, a vawi 6-na chu January 25, 2024 khan neih leh niin tun tum hi Mizoram sawrkar thar a pian hnu a thutkhawm vawi 2-na a ni thung.