Sports Minister in Youth Affairs and Sports hotute kawm

Mizoram sawrkar-a Sports & Youth Services Department changtu Minister Lalnghinglova Hmar chuan niminpiah khan New Delhi-ah Ministry of Youth Affairs and Sports hotute kawmin, Mizoram thalaite hmasawnna kaihhnawiha hmalakna kal mek leh hmathlirte a sawipui.

Sports Minister Lalnghinglova Hmar hian Secretary to Government of India, Department of Sports Sujata Chaturvedi, SAI Director General ni bawk hmuin Mizoram-a SAI Training Centre tihchangtlun dan tur a sawipui a, ziaka ruahmanna a thehluhte chu an lo bawhzui tur thu SAI-a Director General chuan a lo hrilh a, April ni 26-a 'Aizawl International Half Marathon' neih turah Sports Authority of India hriatpuina leh pawmpuina dil pawh Director General chuan hmalak pui ngei a lo tiam bawk a ni.

Youth Services Minister Lalnghinglova Hmar hian Secretary to Government of India, Department of Youth Affairs  Meeta R. Lochan  pawh hmu nghalin Mizo thalaite'n State pawna 'exposure' tam zawk an neih theih dan tur a sawipui a, Mizo thalaite tana tangkai thei Ministry hmalakna kal mek leh hmachhawpte a sawipui bawk a ni.