Education Minister in Union Minister te a kawm

School Education Minister Dr. Vanlalthlana chuan Sawrkar laipui Minority Affairs leh Parliamentary Affairs changtu Minister Kiren Rijiju bakah Development of North Eastern Region (DoNER) leh Education changtu Minister of State Dr. Sukanta Majumdar te chu hmuin Mizoram hmasawn nana pawimawh leh tul hrang hrangte a sawipui.

New Delhi-a cham mek School Education Minister Dr. Vanlalthlana hian niminpiah khan Minority Affairs leh Parliamentary Affairs changtu Minister Kiren Rijiju hi hmuin kawng hrang hranga Mizoram hmasawn ngaihna laite a sawipui a, Sawrkar laipui nen thawhhona tha tak neih a nih theih nan a chan Ministry of Minority Affairs pawimawhnate a sawipui a. Mizoram in tanpui a ngaihna zawnah theihtawp chhuahpui thin turin a ngen nghal bawk.

Education Minister Dr. Vanlalthlana chuan DoNER leh Education changtu Union Minister of State Dr. Sukanta Majumdar pawh hmuin Mizoram Legislative Assembly thutkhawm hnuhnung berin Mizoram State University Bill a pawm thu a hrilh a. Mizoram State University din chhoh a nih hunah Sawrkar laipui puihna leh kaihhruaina mamawh a nih dawn thu a thlen a. Heng bakah hian Mizoram zirna in sang zawkte tih hmasawn nana pawimawh hrang hrangte sawipuiin, Sawrkar laipui puih ngaihna laite a sawipui bawk.

Hei bakah hian Minister hian Medhavi Skills University, Gurgaon chu tlawhin Education leh IT Sector kaihhnawih Company/Corporate pariat te chu a thlenna Mizoram House-ah a kawm bawk a ni.